آذربایچان ناغیل لاری

متن کامل

کتاب" آذربایچان ناغیل لاری 1" نوشته ی قنبر سیفی توسط انتشارات آواز به چاپ رسیده است.
آذربایجانین فولکلور اوجاقلارینین بیری ده، اونون اورتا بؤلگه سی اولان قاراداغ ماحالی دیر.
بوگونه دک هله ده اون سکگیز ماحالدان یارانان بؤلگه لرینی دولانیب، اونون بوتون فولکلور عنصرلرینی توپلاییب آراشدیرمادا اوجاقلارینا و یا چاپ اوجاقلارینا تاپشیران اولمامیشدیر. بو آغیر ایشه یقین کی آکادمیک امکانلاری اولان بیلیم و آراشدیرما اوجاقلاری قول قویاجاقلار، آمما ایندیلیکده بعضا فولکلور عنصرلریمیزی آراشدیرماغا و اونلاری توپلاماغا چیرمالانان فداکار اینسالارلا راستلاشیریق. قاراداغداسینه دن سینه یه کئچن و هله ده یالنیز خلقین یازیسیز یادداشیندا یاشان ملی ثروتلریمیزی توپلاماغا و اونلاری گله جک سویلاریمیزا تاپشیرمادا، نوچه ایلدن بری داها آرتیق تلاش گؤسترمیش و بو آغیر ایشین عهده سیندن اوغورلا گله بیلن قلمداشیمیز جناب قنبرسیفی جنابلارینا اؤز اؤز درین تشکرلریمی بیلدیرمک ایستردیم. خلق وارلیغیمیزین قایغیسیندا اولان بوده برلی وطنداشیمیز، نئچه ایلدیر کی توپلادیقلاری ناغیللارلا، نشر ائتدیگیمیز «ائل ادبیاتی» آدلی فولکلوریک درگی ده چیخیش ائدیر. اونون بو آغیر ایشه اورکدن گیریشمه سی یادیما چوخ آز حالاردا تیکرار اولا بیلن خاطیره نی جانلاندیردی.
یاخشی یادیمدادیر کی 26 – 27 ایل بوندان قاباق، اونودولماز دوستون رحمتلیک شاعریمیز «عمران صلاحی» تورکیه سفرینده اولموشدو. او، گنجلیک ایل لرینی یاشایان شاعر دوستلارینین بیر چوخونا تورکیه دن شعر و ادبیات کیتابلاری آلیب گتیررمیشدی. منه ده بیر کیچیک سربست شعر مجموعه سی گتیررمیشدی. همن شعر مجموعه سینین اؤن سؤزونده یازیلمیشدی کی «بو مجموعه یه داخل اولان شعرلرین شاعری 55 یاشینا قده ر مطلق شعر یازمامیش و شاعرلیک شوقونا دوشمه میشدیر، آمما اونون چوخ سئودیگی حیات یولداشی دونیاسینی دییشرکن، شعره ساری چکیلیر و یئنیلیک ماهیت لری اولان سربست شعرلر یازیر.»
اؤن سؤز مؤلفینین یازدیقلاری منده ده تعجب حس لری یاراتدی. آخی حیاتینی اؤیرندیگیم شاعرلر بوتون گنجلیک ایل لریندن شعره باشلامیشلار و بو بیر استثنا اولاراق همیشه ذهنیمده قالیر. دئمک اولار کی بو 25 ایل سونرا، بو موضوع ایله باشقا بیر شکیلده قارشیلاشدیم. یاخشی یادیمدادیرکی ائل ادبیاتی درگیسینین بیرینجی سایسینی چاپدان بوراخدیرمیشدیق کی جناب سیفی ناغیللاریمیزین توپلانیلماسی اوچون بوندان بئله سعی گؤسترمه سینه گلدیگی قراری بیر ادبی گؤروشده منه خبر وئردی؛ در حال او تورکیه لی شاعر یادیما دوشدو، چوخ سئویندیم و سئوینجلریمی دوستومدان دا گیزلتمه دیم و اوندان ایسته دیم کی چئوره سینده اولان هر کسدن یارارلانسین و بو ادبی مدنی قوللوغون یئرینه یئتیریلمه سینده بوتون سعی لرینی گؤسترسین. ایندی او گوندن ایکی ایل اؤتور و جناب سیفی الیمیزده اولان کیتابی توپلامیش و اوخوجولارا چاتدیرا بیلمیشدیر. آخی او، ایکی ایل قاباقدان ایره لی هئچ وقت بو ایشلرله مشغول اولمامیشدی و بو زمینه لرده هئچ وقت بیر صحیفه ده توپلامامیشدی.
ایندی اونون توپلادیغی بو ناغیلار داها آرتیق قاراداغ اینسانینین بیر چوخ یؤنلرده دوشوندویونو، و او توپلومون اوزاق ایل لرده یاشادیغی حس لرین المنت لرینی بیزه چاتیرماقدا بؤیوک آددیملار آتا بیلمیشدی. او بیر قلمداش کیمی فولکلوریک «ائل ادبیاتی» درگی سینده ده صمیمیتله بیزیمله امکداشلیق ائدیر. یقین ائدیرم کی بو سانباللی اثر ادبیات تاریخیمیزده اؤز آغیردیرینی تاپا بیله جک. ائله جه ده ادیب لریمیزین و تدقیقاتچی لاریمیزین میز اوستو کیتابلاریندان اولاجاقدیر. بؤیوک همت گؤستردیکده بو ناغیلاری خلق دیلیندن توپلاییب اوخوجولارا، ائلیمیزه، یوردوموزا اؤزملی بورجون شرفله اؤده ین قلم دوستوما عشق اولسون دئییرم و بو اونودولماز خدمتلره گؤره جناب سیفی نی اورکدن تبریک ائدیرم. عؤمورو اوزون، یولو اوغورلو و گئده رلی اولسون.
-    ائل اوغلو
 

14 اردیبهشت 1398
تعداد بازدید: 21
محصولات مرتبط

نظرات

دسته بندی محصولات
ارائه کنندگان
مرورگر شما بسیار قدیمی است!
جهت مشاهده این وب سایت به صورت صحیح، بروزرسانی مرورگرتان ضروری خواهد بود. بروزرسانی مرورگر
×