فرعونون دفتري اثري حاقیندا

متن کامل

کنعان حاجينين فرعونون دفتري اثريني اوخودوم. کيتابين ايلک ياريسي مني اوزاقلارا، اوشاقليق ايللريمين چتين گونلرينه آپاردي. باخچايا گئتديگيم واختلاردان، ماهنيدا دئييلديگي کيمي دويغولو، قايغيسيز مکتب ايللرينه کيمي گئديب چيخديم. کنعان حاجينين جملهلرله اوستادجاسينا اويناماسي، خصوصي ايشلمهلري، يئني، آز ايشلهنن و آرخايیک سؤزلردن استفاده ائدهرک جملهلري مونجوق کيمي آرد-آردا دوزمهسي آدامي واله ائدير. بو دا کنعان حاجينين گئنيش مطالعه بازهسينه صاحيب اولماسيندان خبر وئرير. بير يازيچي کيمي مشاهدهسينين خيرداليقلاريني روماندا حيس ائتمک اولور. کنعان حاجي حادثه لري ژان گلور کيمي قلمي ايله ائله اوينادير کي، اوخوجو اؤزونو توفاندا ييرغالانان گميده حيس ائدير. گاه گؤيه قالخيرسان، گاه دا يئره چيرپيليرسان. گولمکدن اوغوندوغوم حيصه لر اولدوغو کيمي، کؤورلديگيم، دهشته گلديگيم مقاملار دا اولدو. کنعان حاجي فيکريني توصيه، تکليف کيمي يورودهرک اوخوجونو بئزديرمير، عکسينه حادثه لر، حکايهلر دانيشاراق اوخوجونون اؤزونون آنلاماسيني، حيس ائتمهسيني گؤزلهيير... 
کيتابين ايلک 9 صحيفه سي قاتاردا باش وئرن حادثهلره اساسلانير. قاتارين خصوصي آب و هاواسي اولدوغو اوچون همين یئرلره دوشورسن. قاتارين ريتمله حرکتي اينسانا نوستالژي حيسلر بخش ائدير. کيتابدا کنعان حاجي اينجه ذوقو ايله بو تمسفري يارادا بيلير. فرعون آدلي کيشينين آياغيني بيلرکدن تابدالاييب تانيش اولماق مسئلهسي اصل يازيچي ايستگيدير. چونکي يازيچي هر زامان ماراقلي اوبرازلار آختاريشيندادير. اوزاقدان مشاهده آپارديغي کيمي، ياخيندان تانيش اولوب بوتون حياتي اؤيرنمک ايستگي يازيچينين اساس آماليدير. اونا گؤره يازيچي يازيچيلارلا اوتوروب دورماغي سئومير. عکسينه تانيماديغي بير اؤلکهده تانيماديغي بير آداملا تانيش اولماق و گؤزلمهديگي حادثهلر ايچينده وار-گل ائتمک يازيچي حياتي اوچون عوض اولونمازدير.
کنعان حاجي بوتون اوبرازلاري ياشاميش يازيچيدير. او آغيرليغي اثرين بوتون حيصه لرينده دويماق اولور. مرمري موم کيمي يومشالدا بيلن داهي هئيکلتراش برنينيدن سوروشورلار کي، انسانلاري نئجه مشاهده ائديرسن؟ بو سوالا بئرنيني گؤزل بير جواب وئرير. او دئيير کي، بير انسانين هئيکليني دوزلتمهيه باشلاماميشدان اؤنجه گونلرله اونون دانيشماغينا فيکير وئريرم، اوز ميميکالارينا گؤز قويورام. چونکي انسان دانيشارکن اولدوغو کيمي اولور. گيزلنه بيلمير. کنعان حاجي دا بوتون اوبرازلاريني مشاهده ائدير، اؤز اورک و بئيين سوزگجيندن کئچيرهرک حاضير شکيلده اوخوجويا تقديم ائدير. 
کنعان حاجي "فرعونون دفتري" رومانيني 3 ايله يازيب. مارتين پاژ يازير کي، اثري بير گونه يازيب قورتارماق اولار. لاکين اونو فورمايا سالماق، جوملهلر آرتيرماق، بعضي يئرلريني سيلمک ايللر آپارير. آنجاق استثنا حال لار دا وار کي، يازيچي بير آيا رومان يازيب بيتيرير. يازماق اراده مسئلهسيدير. بو باخيمدان کنعان حاجييا ايرادهلي اينسان دئمک اولار. سانکي بير دولگر کيمي آغاجي دفعهلرله يونوب اينجه صنعت نمونهسي يارادير.
اثرده هئچ بيري شيشيرتمه حادثه سي گؤرمهديم. هر شئي طبيعي، حادثه لر اؤز آدي ايل، اولدوغو کيمي يازيليب. بوتون چيلپاقليغي ايله اثر داش اورگي اولان اينساني دا اوودا بيلر. "فرعونون دفتري " روماني هم ده تاريخي حادثه لردن، روايتلردن گئنيش تصوير يارادير.
اثريني اوخودوغون مؤليفي تانيماق اؤزو بير بؤيوک حادثه دير. کيتابي اوخويا-اوخويا مؤلفين حرکتلري، دانيشيق تونو، باخيش لاري گؤزلريم اؤنونده جانلانيردي. سانکي کنعان حاجي اؤزو منيم اوچون کيتابيني اوخويوردو. 
خارجي اثرلري آذربايجان ديلينده اوخوياندا شيرينليگي حيس ائتميرسن. يئرلي ادبياتي اوخوياندا او شيرينليگي، درينليگي داها ياخشي دويماق اولور. اونا گؤره اؤز ادبياتيميزا چاتان ادبيات گؤرمهديم. لاکين کنعان حاجينين سؤزو گئدن رومانيني خاريجي ديل لره ترجمه ائديلمهسيني ايسترديم. بيزيم اؤلکهني يوکسک سويهده تمثيل ائده بيلر.
"فرعونون دفتري" 110 صحيفه اولسا دا، قالين-قالين رومانلارين قارشيسيندا آت اوينادير. خيردا بير حادثه نين ماهيتيني مؤلف ائله ايضاح ائدير کي، آدامين آغزي آچيق قالير. 
اثرده دئمک اولار بوتون اوبرازلار گوجسوز، کدرلي مخلوقلار کيمي گؤستريلير. بو قدر اوبراز ايچينده بير خوشبخت انسان گؤرمهديم. بو مني چوخ اوزدو. هئچ اولماسا بير اوبراز گؤزل گونلر گؤرردي.
اثرده تئز-تئز يوخولاردان سؤز آچيلير. اوبرازلار يوخو گؤرور. يوخو اؤزو معما اولدوغو اوچون حاقيندا چوخ دانيشماق اولار. يولي سئزارين آروادي کالپوميا يوخودا گؤرور کي، اونون اريني اؤلدوروبلر. سحري گون سئزار سناتا گئتمهيه حاضيرلاشاندا يوخوسونو اونا دانيشير و آياقلارينا دوشوب ائوده قالماسيني خواهيش ائلهيير. بو صحنهنين شاهيدي اولان بروت خانيمين ضعیفليگينه گولمهيه باشلايير. سونرا سئزاري اؤزويله آپاريب سناتدا باشقا قيامچيلارلا بيرگه اؤلدورور. يوخولارا نه قدر اينانماساق دا، بعضاً يوخودا گؤردويوموز حياتدا باش وئرير. سون جوملهني ائله-بئله يازماديم. کيتابي اوخويانلار آنلاياجاق، اوخومايانلار ايسه اوخويوب آنلايار... 

نعمت متين
 

17 اردیبهشت 1398
تعداد بازدید: 1169

نظرات

دسته بندی محصولات
ارائه کنندگان
مرورگر شما بسیار قدیمی است!
جهت مشاهده این وب سایت به صورت صحیح، بروزرسانی مرورگرتان ضروری خواهد بود. بروزرسانی مرورگر
×