هر بیر دیلده ادبیّاتین هر بیر ژانرینین تمل داشینی دوْغرو دۆزگون قوْیماق اۆچون کئچمیشلردن باشلاییب دۆنیا سطحینده اوْ ژانرین زامانلا نئجه آددیملاماسینی معیار توتوب ائلهجه ده فرقلی دؤن لرین شاخص و اؤنملی اثرلری اوْ دیله چئوریلمه لیدیر، تا کی چاغداش ادبیّاتین پایاسی اوْ ژانردا گۆجلو قورولا بیلسین. درام ادبیّاتی دا باشقا ژانرلاردان مستثنی دئییل دئسک سؤزو تام یئرینه یئتیرمه میشیک، نییه کی بو ژانر اوْ بیریلره گؤره داها چتین و دقّته محتاج بیر ژانردیر. تئاترا، اؤزللیکله ده درام ادبیّاتینا آکادئمیک باخیلسا سؤزونو دانیشدیغیمیز تمل داش، میلاددان اؤنج ه 5 و 4-نجو عصره عایید اسکی یونان تئاتریندان باشلایاراق قوْیولمالیدیر و زامانلا آددیملایاراق گلیب انگلستان ین 15 و 16-نجی عصریندهکی ائلیزابئت دورانی، و بو دؤنمین اؤلمز پارلایان اولدوزو شئکسپیئره چاتمالیدیر. نییه کی سوفوکل، اوْریپید، آریستوفان و بیر چوْخ باشقا کلاسیک درام یازیچیلارینین اثرلرینی اوْخومامیش اوْلساق شئکسپیئرین هانسی تمللر اساسیندا و نئجه ظهور ائتمهسینی آنلاماییب و بئلهلیکله فایدالانماغیمیز سادهجه اثردن آلدیغیمیز لذّته خولاصه اوْلوناجاقدیر. آنجاق بو کیتابدان اؤنجه شئکسپیئرین ان گؤرکملی اثری اوْلان هاملئت – آذربایجانین دَیَرلی شاعیری طلعت ایّوبون چئویرمهسی ایله – یاشماق ادبی قورولوشو الی ایله چاپا حاضیرلانیب یایینلانماسی، هابئله اوْخوجولارین –اؤزللیکله ده تئاترچیلارین – استقبالینا گؤره، شئکسپیئردن ایکینجی اثر اوْلاراق اوْتئللونو سئچرکن اوْنون تایسیز-عوضسیز ترجومهسینی اله آلیب چاپا حاضیرلادیم.

 

بوگۆنکو گۆنوموزده فرهنگ ساحهسینده سؤز وئرمک ایمکانسیزا یاخین قدر چتین بیر ایشدیر، اوْنا گؤره ده درام ادبیّاتیندا سؤزونو دانیشدیغیم آتلانمیش تمل اثرلرین تئزلیکله قوللوغونوزا چاتدیریلماسینا سؤز وئره بیلمهسم ده مۆطلق بیر گۆن بو ایشی گؤرهجگیمی آرزیلایا بیلرم. ایران جوْغرافیاسیندا یاشاییب انگلیس دیلی بیلمهین تئاتر ایله ادبیّاتسئورلر شئکسپیئری فارسجا ترجومهلری ایله تانیییبلار. بوگۆن آذربایجانین شئکسپیئرشناس مۆترجیمی صابر مصطفینی تانیماق بیزه بیر سعادت ساییلا بیلر نییه کی اوْنون ویلیام شئکسپیئردن اوْلان ترجومهلری؛ باشدا ایسه اوْتئللو اثرینین مؤحتشم، طنطنهلی، زنگین منظوم چئویرمهسی ادبیّاتیمیزدا بیر زیروه ساییلاراق، تئاتریمیزین صحنهلرینی بارلاندیراراق، یئنی آیاق توتماقدا اوْلان چئویری بیلیم  )ترجومه مطالعاتی(  ساحهمیزده ده گؤرکملی بیر اؤرنک کیمی هر زامان پارلاماقدا اوْلما قابلیّتینی داشیماقدادیر.  بو گؤرکملی شئکسپیئرشناس چئویرمنی تانیتدیرماق اۆچون گلهجکده درگیلریمیزدن بیریسینده بیر و یا نئچه یازی حاضیرلاییب یایینلاماغا چالیشاجاغام