کوراوغلو

توپلایان: همت علی زاده

دوزلتمن، سؤزلوک و یئنیدن یازان: علیرضا یخفروزانی

ناشر: انتشارات نباتی

224 صفحه

چاپ اول 1391

شابک: 3-41-5892-600-978

«کوراوغلو» تورک دنیاسینین ان بؤیوک ملی فهرمانلاریندان بیریدیر. او کیچیک یاشلاریندان پاشالارین، خانلارین ظلمون گوروب، اونلارا یاغی اولوب و عمرونون سونونا دک اونلارین ظلمونه قارشی دورموشدور. ائله بونا گوره ده اونون یورد سالدیغی چارداخلی چنلی بئل ده بیر طبیعی و ال چاتیلماز قلعه کیمی بوتون آزادلیق سئور کیشیلرین ییغیناغینا چئوریلمیشدیر. پاشالارین ظلمونه دؤزمه ییب اؤلکه لرینین و ملتلرینین آزادلیغی اوچون جاندان کئچن دلی ایگیدلر اولکه نین هر یئریندن چنلی بئله گلیب کوراوغلویا آرخا و کؤمک اولوب پاشالار و خانلارلا ساواشیبلار و بئله لیکله کوراوغلو اسطوره سین یارادیبلار.

«کوراوغلو» حماسه سی بیر سیرا تورک و قونشو اؤلکه لر آراسیندا گئنیش یاییلمیش و اؤزونه اؤزل یئر آلمیشدیر. «کوراوغلو» قهرمانلیق داستانی چوخ بؤیوک بؤلگه ده، دوغو اوروپادان توتدو ایران، افغانستان،اورتا آسیا،گورجولر،کوردلر،ارمنی لر و ... آراسیندا یاییلمیشدیر. داستان بیر چوخ دیللره او جمله دن بیرسیرا اوروپا روسی دیللرینه چئوریلیب، باسیلیب، یاییلیب و اوخوجولارین ایلگیسینی چکمیشدیر.

بو آرادا همت علی زاده کوراوغلو داستانلارینین توپلانماسینا چوخ زحمت چکیب بؤیوک خدمتلر ائتمیشدیر. او آیری - آیری عاشقلاردان توپلاییب ترتیب ائتدیگی متنی سؤیله ییجی عاشقین دانیشدیغی شیوه و طرزده اوخوجولارا چاتدیرمیشدیر.

علیرضا یخفروزانی

یای 1390