هر رنگ دن

پدیدآورنده: دکتر حمید نطقی (آیتان)

ناشر: انتشارات ارک

اوستاد نطقی منیم عؤمور بویو گؤروب تانیدیغیم ان بؤیوک و چوخ جهتلی عالیملردن بیریسی بلکه دن ان گؤر کملیسی دیر. من نه ایراندا، نه ده ایراندان خاریجده اونون کیمی عالیم گؤرمه میشم. اونون آنسیکلوپدیک بیلیگی، چوخ گئنیش کولتور، خارق العاده حاقظه سی تایسیز و ائشسیز دیر. بو قده ر گئنیش و درین بیلگییه صاحیب اولان اوستاد عینی زاماندا اینجه روحلو و شاعیر ذؤقلودور. گنجلیگیندن بری گؤزه ل شعرلر سؤیلر و یاخین دوستلارینی شعرلریله ده اؤزونه حیران ائدردی. حیف کی شعرلرینی توپلاییب نشر ائتمگی اهمال ائتمیش دیر و بو سببدن بیر چوخ شعرلری ایتیب گئتمیش و اونودولموشدور.

بو گون الینیزه گئچن شعرلر مجموعه سی اونون دئدیگی شعرلرین آنجاق بیر حیصه سی دیر. بونون دا توپلانماسینی انگلستاندا کی فراغتینه، و نشر اولونماسینی دا حؤرمتلی دوستوموز آقا کریم مشروطه چی (سؤنمز) ه بورجلویوق. 

اوستاد حمید نطقی اوچ ایل اول انگلستانا تدریس اوچون دعوت اولوندی. بیر مدت سونرا اورادا خسته لندی و بیر سوره معالجه ایله مشغول اولدو. چوخ شوکور ایندی خسته لیگی توختامیش ویئنی دن علمی چالیشمالارینا باشلامیشدیر. بو عالیم شاعیریمیزین بیرینجی شعرلر مجموعه سی حقینده فیکیر سؤیله مک، و اینجه لیکلری باره ده دانیشماق یئرینه، حؤرمتلی اوخوجولارین نظر دقتی نی، گؤر کملی معاصیر شاعیریمیز کریم آقا مشروطه چی (سؤنمز) ین، مشترک دوستوموز استاد حمید نطقی یه یازدیغی احساسلی مکتوبونا جلب ائدیرم. 

عزیز اوخوجولاریمیزا بیر کز داها بیلدیرمک ایسته ییرم کی بو بؤیوک  عالیم شاعیریمیزین ائلینه، دیل و ادبیاتینا باغلی لیغی سؤنسوز اولوب، بو ساحه ده ائله دیگی خدمت ده حدودسوزدور. یازیمین سونوندا اوستاد حمید نطقی یه و وفالی عائله سینه اولو تانریدان ساغلیق و اوزون عؤمور دیله ییرم.

دوقتور جواد هیئت