ایضاحلی ساز سوز لغتی

مولف: پرفسور تاری یئل محمداوو

حاضیرلایان: عیوض پورحسن

ناشر: آذر توران - نباتی

142 صفحه

بیرینجی چاپ 1398

شابک: 7-77-6063-622-978

آذربایجانین شیفاهی عنعنه لی خالق پئشه کار موسیقی سینین یارادیجیلاری، بو صنعتین عنعنه لرینین داشییجیلاری و نسیلدن -نسیله اؤتوروجولری - ائپیک روایتچی، ساز-سؤز اوستادلاری اولان عاشیقلاردیر، عاشیق صنعتینین تاریخی تکامولو سایه سینده یارانان عنعنه لر، خالق مدریکلیگینین داشییجیلارینین طالعی، اونلارین ساز-سؤز صنعتی، داستان یارادیجیلیغی آذربایجان ملی مدنیتینین تشکلوندن و انکشافیندا مستثنی رول اوینامیشدیر. آذربایجان خالقینین تاریخی یادداشینی اؤزونده یاشادان بو صنعت دونیانین عموم بشری مدنی ارثینین ترکیب حیصه سینه چئوریلمیشدیر.

نسیلدن - نسله شیفاهی اولاراق ائشیتمه یولو ایله و فردی مولف دست - خطی ایله اؤتورولن عاشیق مدنیتی آذربایجان خالقینین مین ایللیک تاریخینین حیات قایناقلارینی یاشاداراق، بلاواسطه عنعنه وی بیلیکلر و معنوی دیرلر سیستمینین یارادیلماسیندا، قورونماسیندا و تکمیل لشمه سینده اشتراک ائتمیش، گئرچکلیگین، انسانی احاطه ائدن عالمین ساکن آنلامینا، دوشونن و یارادان انسان تفکرونون فورمالاشماسینا تکان وئرمیشدیر.

عنعنه وی موسیقی مدنیتی، بلاواسیطه آذربایجان خالق پئشه کار عاشیق یارادیجیلیغی نمونه لرینین توپلانماسی، یازییا آلینماسی و قورونماسی متدیکاسینین ایشله نیلمه سی دایم آکتوال اولان بیر مسئله دیر. عمومیلیکده شیفاهی بدیعی مدنیت ساح لرینه آرتان ماراق، ملی ائتنو موسیقی شناسلیغین علمی آپاراتینین تکمیل لشمه سی، چوخ سایلی و اهمیتلی تدقیقاتلار نتیجه سینده میدانا گلن نشرلر، تجربه دن یارانان علمی مدعالار و بو مسله نین گئنیشلیگینی و چوخ جهتلی لیگینی قاباریق نمایش ائتدیریر. بونونلا بئله، بدیعی ارثین بو سجیه وی ساحه سینده "آغ لکه لر"، هله آراشدیریلمامیش جهتلر قالماقدا داوام ائدیر. بودا طبیعیدیر، چونکی موسیقی فولکلورو اونو دوغوران و یاشادان محیطله، اوونون یارانماسینا و عنعنه لرین اؤتورولمه سینه تکان وئرن شرایطله سیخ باغلی اولوب، اؤزونه خواص دینامیک حیاتینی داوام ائتدیریر، انسانلارین شعورونا و دوشونجه سینه تاثیرینی آرتیراراق، اونلارین فعالیتینی ائموسیونال جهتدن زنگینلشدیریر. کتابا عاشیق یارادیجیلیغیندان، اونون لوکال،رئگیونال و ائتنومدنی واریانتلارینین اؤزللیکلریندن بحث ائدن 600 مقاله داخیلدیر. لاکین کتاب لغت تعیناتی داشیدیغیندان بورادا شیفاهی عنعنه لی پروفئسیونال خالق موسیقی سینین چوخ جهتلی و سپئسیفیک جهتلرینین آراشدیریلماسی قارشییا بیر مقصد کیمی قویولمامیشدیر. بورادا الیفبا سیراسی ابله عاشیق صنعتینین موسیقیلی پوئتیک تئرمینلری، عاشیق هاوالاری و پوئتیک فورمالارینین آدلاری، عنعنه وی مکتبلر حاقیندا معلومات، ساز صنعتی، اونون سپئسیفیکیلیی، بیر سؤزله، عاشیق لئکسیکوقرافییاسینین کلاسیک استقامتینین نظری و پراکتیکی آسپئکتلری اؤز ایفاده سینی تاپمیشدیر. لغت گئنیش متخصص آودوتییاسینا - ائتنوموسیقی شناسلارا، کولتورولوقلارا، فولکلورچو فیلولوقلارا، شرق شناسلارا، تاریخچیلر، تورکولوق - مئدیوویستلر، عالی و اورتا اختصاص مکتبلرینین معلم و طلبه لرین، همچنین آذربایجانین شیفاهی عنعنه لی پروفئسیونال موسیقی مدنیتی، اونون مدنی ارثی و معاصیر مدنیتی ایله ماراقلانان هر بیر کسه عنوانلانمیشدیر. کتابین عرصیه گلمه سینده امگی اولان هر بیر کسه اورکدن میننتدارلیغیمیزی بیلدیریریک.

تاری یئل محمداوو