عاشیق شعرینین پوئتیک بیچیملری و چئشیدلری

محرم قاسیملی و محمود الله مانلی

حاضیرلایان: عیوض پورحسن

ناشر: آذرتوران و نباتی

252 صفحه

بیرینجی چاپ 1398

شابک: 1-66-6063-622-978

آذربایجان عاشیق ادبیاتی تاریخی آنلامدا قدیم تورک اوزان-باخشی- آکین-ییرچی عنعنه سینین ترکیب حیصه سی اولماقلا یاناشی، اؤزونه مخصوص پوئتیک قالیب و بیچیملر، شعر چئشیدلری، اوسلوبی امکان و بدیعی واسطه لره مالیک اولان بدیعی تفکور حادثه سیدیر. بورادا تاریخی مشترکلیگی - اورتاقلیغی تامین ائدن (و همیده تظاهر ائتدیرن!) بایاتی - ژیر - آیدیم - مانی - کوشوک - خوریات - اؤلنگ کیمی ایلکین شعر بیچیملریندن نهنگ ائپوس سیستمینه قدر بوتون منظره هم آرخایکلیگی - اورتاقلیغی گونوموزه داشییب گتیریر، همیده آیری -آیری چاغداش چئوره لرده (آذربایجان، قازاخ، قیرغیز، اؤزبک، تورکمن، تورک، تاتار، اویغور، باشقیرد، کوموک و س)

سؤز صنعت تکاملونون هانسی دایاقلار اؤلچولراوزرینده گئتدیگینی اورتایا قویموش اولور. بو آنلامدا آذربایجان عاشیق صنعتینین تاریخ ایچیندن داشییب گتیردیگی شعر بیچیملری و اونلارین چوخ سایلی چئشیدلری اورتاق تورک مدنیتیندن گلن طرفلریمیزی، زامان ایچیندسه اؤزوموزون آذربایجان تورکجه سی و بدیعی پوئتیک تفکورو یارادیب دؤورییه قاتدیغی ادبی گئدیشاتی گؤزوموز اؤنونه گتیریر. اؤز کؤکلری و تاریخی قایناقلاری ایله چوخ - چوخ قدیملره باغلانان بو صنعت حادیثه سی ابتدایی دوشونجه دن گونوموزه قدر کی ائتنومدنی یادداشتی ایفاده ائتمک باخیمیندان مستثنی تاریخی کیفیتلرله سجییله نیر. عمومییتله، عاشیق شعرینین پوئتکنولوژی سیستمی ساده دن مرکبه دوغرو ایرلیله ین یئنیلشمه لرله، آیری - آیری اوستادلارین صنعته گتیردیگی علاوه لرله دایم حرکت و زنگینلشمه ده منظره سازین و سظرزون اورتاقلیغیندا، سؤز و موسیقینین وحدتی سایه سینده بیرگه مضمون یاراتمادا، مدنی ائستئتیک تصوورلرین سینکرئتیک بوتؤولشمه سینده هر گون، هر ساعات اؤز یاشاریلیغینی، ایرلیگه گئتمک امکانینی تامین ائتمک گوجویله دقت اؤنونده دیر.

عاشیق صنعتینین بدیعی ائستئتیک انرژیسی، اونون مؤوجودلوق، ایرلیگه داشینما گوجو، پوتئنسییاسی بوتونلوکده خالقین ائتنومدنی سیستمینین عمومی مضمونوندان گلیر. اسکی زامانلاردان بو یانا صنعتین گلدیگی یول اؤز تاریخی میسییاسی ایله خالقین ایچ دونیاسینی، تاریخی دؤنملرینی، ایستک و آرزولارینی ایفاده یه کؤکلنمیش و زامانین کئشمکش لرینی خالقلا بیرگه آددیملامیشدیر. اونا گؤره ده بوراداکی سینکرئتیکلیک (موسیقی، رقص، شعر،سؤیلمه، تئاتراللیق، بسته چیلیک و س.) ماهیته یؤنه لیک حادثه کیمی بوتون دؤورلرده قورونوب ساخلانمیش و ائتنوسون تاریخی - مدنی یولونون اساس استقامتلریندن بیرینی معینلشدیرمیشدیر. اونودا دئیک کی، فولکلورشناسلار، ائتنوقرافلار، موسیقی شناسلار و دیگر متخصیصلر مختلف موستویلرده اوزان - عاشیق مدنیتی ایله باغلی گرکلی ایشلر گؤموش، جدی علمی نظری ملاحظه لر یوروتموشلار. عاشیق شعرینین بیچیم و چئشیدلری باخیمیندان یورودولن ملاحظه لرده بورا داخیلدیر.