اینجی دوزوملری 1 

(آتالار سؤزو و مثل لر، آتماجا و کنایه لر، آلقیشلار، قارغیشلار و ...)

توپلایان: شهرود بدری (آغداشلی)

آچیب آراشدیران: شهرود بدری - یعقوب علیزاده

ناشر: پارلاق قلم

484 صفحه

بیرینجی چاپ 1399

شابک: 5-13-6993-622-978

بیزیم دیلیمیز و ادبیاتیمیز یوز ایله یاخین طبیعی و علمی یولوندان قالدیغینا گؤره، بو ادبیاتین بؤیوک حیصه سی کتابلاردا یوخ؛ بلکه بیزیم قوجالاریمیزدادیر. قوجالاریمیزیندا چوخو دنیاسین ده ییشیب؛ بیلدیک لرینده اؤزلری ایله تورپاغین آلتینا آپاریبلار. قالیب - قولانیدا تورپاغین آلتینا گئتمه سین دئیه؛ منجه ایندی لیکده ان ده یرلی بورجدور هئچ اولماسا کندینین، شهرینین، بؤلگه و اؤلکه سینین آغیز ادبیاتین؛ یعنی؛ ناغیللارین، افسانه و اساطیرین، عاشق ادبیاتین، سئوگی و محبت ناغیللارین، لطیفه لرین، بایاتیلارین، آتالار سؤزو و مثل لرین، آتماجا، کنایه و استعاره لرین، دعا و آلقیشلارین، قارغیشلارین، تاپماجالارین، متل لرین، اوخشاتما و تشبیه لرین، اویونلارین و ...ییغیب، توپلاییب، آچیب آراشدیریب، یوروب و تفسیر ائدیب چاپا یئتیریب و یایسینلار. 

بو اؤلکه و تورپاغا بورجلویوق، دوز - چؤره یین یئمیشیک، سویون ایچمیشیک، بیزیم هر تک - تکیمیزین بوینوموزدا حقی وار، اتا -انالاریمیز جان چکیب، جفا چکیب، قان وئریب، جان وئریب بو قیزیل تورپاقلاری دشمندن قورویوب ساخلاییب بیز ایندی ارزوموزه یورد - یووا ائدیب پنهان اولموشوق، راحاتجاسینا یاشاییریق، ناموسوموزو، اؤزوموزو قورویوروق. او بؤیوک انسانلار اینجینیب زحمت چکیب زنگین بیر دیل، ادبیات و فرهنگده بیزه یادگار و میراث قویوب گئدیبلر. اولارمی بیز بو گؤزل لیکده سؤزلره دوداق بوزوب، اؤنم وئرمه ییب، اونلاردان واز کئچیب ایتدی - باتدیسینا دا رضایت وئره ک؟ بو فرهنگین و بو ادبیاتین آرادان گئتمه سی ضایعه و فاجعه دئییل می؟ انسانیته، انسانا، ایرانا توهین دئییل می؟ دوز- چؤرک آدامی توتمازمی؟ آتا - بابالاریمیزین، آغ بیرچک آنالاریمیزین، گلن نسلین، تانرینین جوابین وئرمک اولارمی؟ آدامین جمده یینه توپورمزلرمی؟ الله قویسا بیز ایسته ییریک شرق و غربین فرهنگی یوروشونون قاباغیندا دایاناق؛ یوزمین نفری شهرده باخیب گؤرورسن بیر نفر اؤز دیلینده باشاریب یازان بوخدور، توحشون قاشی اولار، گؤزو؟ به بو توحش دئییل نه دیر؟ بونلا شرق و غربین فرهنگی یوروشونون قاباغیندا دایانماق اولارمی؟