قالانی خاطره دیر

بابا وزیر اوغلو

حاضیرلایانلار: علی نوروش و ترانه حسینلی

ناشر: نباتی و آذر توران

158 صفحه

بیرینجی چاپ 1399

شابک: 8-069-227-622-978

کتابا اؤن سوز یازماق دا بیر عادت اولوب و ائله بیلیرم کی، خئییردن باشقا هئچ کسه بیر زیانی اولمایاجاق - اؤن سؤزدن نییه قاچمالیییق آخی؟

ایش ائله گتیریب کی، منیم ده کتابلاریم همیشه اؤن سؤزله جماعت آراسینا چیخیب - بؤیوک صنعتکارلاریمیزین، قلم صاحب لریمیزین خئییر - دعاسی ایله. منیم ده منیم یازیلاریم یاره ده یاخشیلی - پیسلی آغزینی آچیب بیر کلمه سؤز دئین، الینه قلم گؤتوروب بیر جمله یازان هر کسه اورکدن منتدارام.

یئنی کتابیم اوخوجولارلا گؤروشه چیخیر. مینلرله، اون مینلرله تانیمادیغیم، اوزونو بئله گؤرمه دیگیم آذربایجانلی گونون هانسی وعده سینده جه بو بالاجا کتابلا اوز - اوزه، تک به تک قالاجاق. اونا گؤره ده ایسته ییرم کی، عزیز اوخوجو، بو کتابین ایلک صحیفه سینی آچیب نغمه لر آدلاندیردیغیم او یازیلاری اوخومامیش اونا بیر نئچه کلمه سؤز دئییم ...

بئله چیخیر کی، اؤز کتابیما اؤزوم اؤن سؤز یازیرام ...

نه اولار، ائله چیخیرسا، قوی ائله اولسون ...

بو نغمه لری نه یه گؤره یازمیشام؟ - ائله سؤزومه ده بوردان باشلاماق ایسته ییرم ...

... منیم ده بوتون اولادلار کیمی آنام وار. ارکناز آدلی بو قادین منی دوغوب، بویا - باشا چاتدیریب و ائله بیلیرم کی، آنام کیمی منی چوخ ایسته ین ایکینجی بیر آدام یوخدور، حتی دونیاداکی بوتون باشقا آنالاردان هئچ کس، ارکنازین اوغلو بابانین سئودیگی کیمی، اولادینی سئوه بیلمز. عؤمروم بویو الیمده قلم، اؤنومده کاغیذ باخا - باخا قالسام، بو سئوگینی یازماغا سؤز تاپمارام.

سئوگی بورج دئییل. یاخشی سئون آدام یئله فیکیرلشیر - چونکی تمیز اور کله سئونلر بوتون خیری - زیان حسابلاریندان، سیاستدن، ریادان اوزاقدیرلار. آمما سئویلن آداملار همیشه بو بورجون قاباغیندا وجدان عذابی چکیر، هئچ اولماسا، بو سئوگییه لایق اولماغا جان آتیرلار. بس من - یازیچی بابا وزیر اوغلو بورجوندان نئجه چیخیر؟!

الرینه قابار وئردیم،

اوره یینه غبار وئردیم،

آیریلیغی نوبار وئردیم،

باغیشلا، آنا، باغیشلا ...