شیرین ناغیللاریمیز

(اوشاقلیقدا ائشیتدیگیم ناغیللاردان)

یئنیدن یازان: نورالدین مقدم (آیدین دومان)

ناشر: آیدین ساو

144 صفحه

چاپ سیراسی : بیرینجی 1397

شابک: 4-37-8543-600-978

اصلینده،اؤن سؤز یازماق نیتینده دئییلم، آنجاق همیشه مدنیتیمیزه گووه ندیرن بیر دوشونجه وار منیم یادداشیمدا: هنر و ادبیاتیمیزین بوتون قوللاریندا اوقدر زنگین لیک وار، بیر اوشاغی آنا سودو دویوزدوران کیمی، هنری - ادبی احتیاجلاریمیزا، اؤز ائومیزده، یئریمیزده، یوردوموزدا اولان ادبی هنری پایلاریمیز، یئترلی اولور. لایلالاردان، نازلامالاردان توت اوخشامالارا قدر؛ اویونلار، ناغیللار، بایاتیلار، تاپماجالار، بولماجالار، ماهنی لار، رقصلر، شعرلر و ... هامیسی روحوموزو اوخشامیش، بؤیوتموش، شکل وئرمیش و شخصیت قازاندیرمیشدیر. نیسگیللر اولسون داوام تاپا بیلمه میش، سونرالار سایدیغیم قوللارین کؤلگه سی ده اولمایان اؤرنکلرین، گؤز اؤنوموزده نمایشه قویولماسی، بیزی اینجه صنعت دونیاسیندان داها اوزاقلاشدیرمیشدی ... .

ناغیللاریمیز آنجاق، زنگین شفاهی ادبیاتیمیزین، ان قدیمی، ان گئنیش، ان کؤکلو، قوللو - بوداقلی حصه سی دیر. هر تک - تکیمیزین بیر جور پاییمیز وار بو ائل واریندان. هامیمیزین توتدوغوموز یاشاییش یولوموز، داوراندیغیمیز داوارانیشلاردا ائتگیسی، ایزی وار ناغیللاریمیزین، سؤزسوز. ائلیمیزین جمعی عقلی بو ناغیللاری یاراتمیش، و بو جمعی عقل، ائلین یول گؤسترجیلرینی چوخ ییغجام و چوخ آیدین ناغیللاریمیزدا گؤسترمیش ....

بو کتابدا توپلانان ناغیللاری، اوشاقلیغیمدا ائشیتمیشم، اؤز ائومیزده. آنام، آتام، جیجه لریم، بابالاریم و باشقا بؤیوکلرین پایی وار بونلارین منیم یادداشیمدا قالیب، کاغاذ اوسته کؤچورمه ییمده. ناغیللارین قایناق آدرسی بئله دیر: موغان، گئرمی، موران بؤلگه سینین مرکزی، یئنیجه شهر آدی وئریلن، کندیمیز «زهرا».

بوناغیللارین چوخو، آزی آدجا، چوخلارینا تانیش دیر. حتی مختلف واریانتیلاری دا یازیلمیش؛ چاپ اولموش و دؤنه لرله اوخونولموش؛ فیلمه کارتونا چئوریلمیش بلکه. آنجاق ائشیتدیگیمله، اوخودوغوم ناغیللار - طبیعی اولاراق - آزجا فرقلی اولدوغوندا، و بعضا ائشیتدیکلریم داها مکمل اولدوغوندا و بعضاده ائشیتدیکلریمین یازیلی نمونه لرینی گؤرمه دیگیمده (جولفی حسن، ایلان حیدر، آرمید آلی ...)، بو کتابی ترتیب ائتمک قرارینا گلدیم. البته بو کتاب بوتون ائشیتدیکلریمی احتوا ائتمیر، گله جکده باشقا ناغیللاری دا یازماق نیتینده یم.

اؤزل آرزوم دا بودور: بو ناغیللارین سئویملی شخصیتلرینی بو گونلشدیریب، بو گونکو شهره، بازارا، خیابانلارا، پاساژلا، آپارتمانلارا مدرسه لره گتیریب، یئنی - یئنی ناغیللار تؤره ده بیلک. بئله لیکله کؤکوموزه دایاناراق، یار یاراشیقلی، چاغداشلیغا اویغون حئکایه لر، شعرلر یارادیب، دوغما اوشاق ادبیاتیمیزی چیچکلندیریب، وارلاندیراق.

نورالدین مقدم ، 1397، تبریز