سلطان آلپ ارسلان

یونوس اوغوز

کؤچورن، مصحیح: نوراله پورشریف

ناشر: آذرتوران و نباتی

بیرینچی چاپ دؤنمی 1399

254 صفحه

شابک: 8-24-7348-622-978

یونوس اوغوز تورکلرین تاریخینه حصر اولونموش بیر سیرا تاریخی رومانلاریندان سونرا مولیفین یارادیجیلیق گوجونه یاخشی بلد اولان اوخوجولارا اؤزون «سلطان آلپ ارسلان» ینی تقدیر ائدیر.

هر شئیدن اول، رومانین بدیعی قورولوشو و یا سبکینین اؤزونه مخصوصلوغو بارده دانیشماق لازیمدیر. بئله کی، اثر تورک تاریخینین، یاخود تورکلرین خصوصیله اورتا عصرلرده دنیانین گئنیش بیر جغرافیاسیندا یاییلماسی نین چوخ بؤیوک (حل ائدیجی) حائثه لریندن اولان «آخین» (آخینچیلارین گلیشی) خبریله باشلانیر. دمیرچی مراد بو خبری ساوالان داغلاریندا، گیزلی بیر مکاندا مسکونلاشمیش دده لره چاتدیریر.

«... بو یئرلرده اسلامین برقرار اولماسیندان اوچ یوز اللی ایل کئچمه سینه باخمایاراق اسکی اینانجلارین بیر قسمی هله ده حاکملیک ائدیردی. ان باشلیجاسی تک تانریچیلیق ایدی. یقین کی، اسلامدا بیرالله لیق اولماسایدی، اوغوزلار بو دینی قبول ائتمزدیلر. بورادا یالنیز اوغوزلارین باشا دوشدویو دیلده دعالار، آلقیشلار، قارغیشلار اوخونوردو. اوغوز دده لری هله ساسانیلرین دورونده تعقیبدن قاچاراق بو داغلارا چکیلمیشدیر. اونلار اوچون سلطان سؤزو، سلطان امری تانری امریندن سونرا ایکینجی ساییلاردی. سلطان اوغوزلار اوچون ائله «یئرده کی تانری» دئمک ایدی ...