بیر سبد قیزیل گولله 

آذربایجان هیجا شعر آنتولوژی سی

حاضیرلایان لار: صالح سجادی، مرتضی سلمانی

تدوین و تنظیم: سعید موغانلی

ناشر: افکار جدید

چاپ اول 1399

شابک: 1-10-6374-622-978

بیر چوخ کتابی آچدیغیمیزدا، اؤن سؤزونو گؤروب «اه، کیمین حوصله سی وار اوخوسون!» دئیه ایچ صحیفه لری آچیب اوخوماغا باشلاییریق. چونکو اؤن سؤزلرده گئدن سؤزلری ازبرله میشیک داها. «گؤزل شاعریمیز، ... اینجه روحلو یازیچی میز، ... طبیعت دن، باشی قارلی داغ لاردان الهام آلان شاعریمیز ..» و بو کیمی سؤزلرین «تنقید» یئرینه ایشله دیلمه سینه گؤزلریمیز آلیشیب. آما قورخمایین! بو اؤن سؤزده، یالنیز ایشینیزه یارایان سؤزلری اوخویاجاق سینیز.

بیز یاخین تاریخ ده، کئچمیش نسل لرین بیزه چاتدیرا بیلدییی شعر آدلی وارلیغین، هانکی ائنیش - یوخوش لاری آشیب، بو دوروما گلدییینی گؤسترمک مقصدیله، بو ایشی باشلاییب و سونوندا بو کتابی حاضیرلامیشیق. بو ندندن آسیلی اولاراق، شاعرلرین سیرالانماسیندا، دوغوم ایل لرینی سیرا اؤنجه لییی کیمی نظرده آلمیشیق. اوخوجو، شاعرلرین رئال حیاتی تاثیری آلتدا قالماسین دئیه بیوگرافی دئدیییمیز شئی دن، یالنیز دوغوم، دوغوم یئری و اؤلوم تاریخی نی گتیرمیشیک. بعضا ده قایناق لارین آز، یادا ناقص اولدوغونا گؤره، بونلارین بیریسینی گؤسترنمه میشک.

اما ندن هیجا شعری؟ بیزیم ادبیاتیمیزا عاید چیخان آنتولوژی لرین چوخو، چاغداش و یاخین نسلین سربست شعرینی گؤسترمه یه چالیشیر. بونلارین ایچینده، دئمه یه هئچ بیر سؤزو اولمایان بیر سیرا کتاب لارا دا راست گلمک اولار، و یالنیز «بیر کتاب دا بیز چیخاراق!» فلسفه سیندن قایناق لانیر. بونلارین چوخو، سربست شعریمیزین تمل لرینی آراشدیرمادان، تکجه یاخین نسلین شعر نمونه لرینی گؤستریب لر. بئله بیر آنتولوژی لر ده ادبیاتین انکشافی اوچون اولمالی دیر، آما یئترلی دئییل. بیزجه، سربست شعریمیزه ان یاخین ژانر، هیجا اؤلچوسویله یازیلان شعرلردیر.

مرتضی سلمانی - صالح سجادی