قوشلار داها قور خمور لار
قوشلار داها قور خمور لار
رقیه کبیری
ناشر: انتشارات یانار
چاپ دوم 1397
184 صفحه
شابک: 9-23-7559-600-978
هئیکله بنزه ییر. بارماقلاری آراسینداکی موشتوک باشیندا، سیگاری توستوله ین بیر خانیم هئیکلی. دیبی دوشموش لؤتگه نین ایچینده ایله شیب. ده نیزله گؤیو بیر - بیریندن آییران سرحددن ساحیله دوغرو گلن لؤتگه یه باخیر. بیر آن هئیکلین قولو ترپه نیر. موشتویو آغزینا آپاریب، اونو اؤپن کیمی توستونو ده ریندن سینه سینه چکیر. اؤسگورور. جانسیز هئیکلدن أت- قانلی بیر اینسانا دؤنور. کؤتویونه جن چکیلمیش سیگاری لؤتگه نین قیراغیندا أزیر. کؤتویو موشتویون باشیندان چیخاردیب، قومسالا آتیر. کؤتوک لؤتگه نین قیراغینداکی زیبیل توپلوسونون اوستونه دوشور. موشتویو خط کش کیمی ایکی بارماغینین آراسیندا ده نیزی ساری توتور. اوفوقدن گلن لؤتگه نین ائنی، موشتوک بویدادی. دیل اوجو میزیلدانیر:
«گؤره سن گلن کیمدی؟»
