100 عاشقانه غزل ملامحمد فضولی

گردآورنده: شاهرخ نخعی، دومان اردم

ناشر: انتشارات ایلقار

چاپ اول 1398

106 صفحه

شابک:0-61-9907-622-978

بؤیوک ملامحمد فضولی حقینده آذربایجان معاصیر شاعری رامیز روشن چوخ دقیق بیر سؤزو وار، رامیز دانیشق لارینین بیرینده، بئله قئید ائدیر کی «فضولی بیر طبیعت حادثه سی دی ...» اصیل معنادا بو سؤز او دئمکدی کی فضولی پویزایاسی اقتدارلارین و اینسانلارین تاریخ بویو قوراشدیغی منافع اویون لاریندان کنار، هابئله واختیلا بو اویدورمالارین قترشی سینا چیخاراق، اؤزونو قورویوب ساخلایان شعر خزینه میزدیر. عینی اوجا داغ لار و دنیزلر کیمی.

فضولی آدینی تاریخی یادداشیمیزدا ساخلایان پادشاه لارین و خاقان لارین آخجالاری و قیزل توربالاری دئییل بلکه مظلوم و تاپدالانمیش اینسان لارین آه و ناله سیدیر.

قبیله لرین سئوگی قاداغاسیندان چؤللره دوشموش و مجنون ایله لیلالارین گؤز یاش لاریلا، حسرت لری قورویوب ساخلامیش دیر. فضولی عددلر دونیاسیندان حق - حساب و پول - پارا دونیاسیندان حرف لر دونیاسینا کؤچور. دئمه لی سؤز و معنا دونیاسیندا اؤز هوندور و گئنیش سارایی نی بینا ائده بیلمیش دیر.

آذربایجان ادبیاتی بعضی ایجتماعی و تاریخی سبب لردن دولایی همشه اؤزونو سادجه کیچیک ادبی جرگه لرین محیطینده گؤستره بیلمیشدی. بعضی شاعیرلریمیزیسه بو کیچیک جرگه لری آشماقدا، اؤتمکده ساده جه اؤز پوئزیالارینا سؤیکه نرک باجارمیشلار. علی آغا واحید، میرزاجلیل محمد قلی زاده، عمادالدین نسیمی، میرزا علی اکبر معجز و شهریار کیمی شاعیرلریمیز خلقیمیزین اتنوپیسکولوژیسینه یاغ کیمی سؤزموش لر. آنجاق دونیانین سرعت له دییشمه سیله و گلوبالاشما پروسئسی بیزیم کولتورموزو اوست باسدیر ائتمه سینه و اونو تاریخی یادداشیمیزدان سیلمه سینه نئجه مانع اولماق اولار. اونلار بیزیم تاریخی یادداشیمیزدا کی میلی روحوموزو یوخ ائدیب. اؤز تاریخی کودلارینی بیزیم اجتماعی حسسیاتیمیزلا عوض ائدیرلر.

بو او دئمک دی کی بیزده گلجک نسیل لر اوچون اؤز حسسیات کودلاریمیزی مدرن و گؤرکم لی شکیلده استحصال ائدیب و خلقه سرگیله مه لییک. بو کیتابی حاضیرلاییب چاپا وئرمک دن مقصدیمیزیسه بؤیوک فضولی نی سؤز دونیاسینی بو گونکو آذربایجان گنجلییینه و یئنی یئتمه نسلینین گونده لیک حیاتیناتانتدیرماقدی.

چاپا حاضیرلادیغیمیز «100 عاشقانه غزل» کیتابی، دوکتور صدیقین رئداکته ائتدییی «غزلیات حکیم ملامحمد فضولی» کیتابیندان سئچیلمیشدی.

شاهرخ نخعی/دومان اردم