صابرین آذربایجان ادبیاتینداکی یئری

یازان: عبدالوهاب یورد سئور

کؤچورن : تیمور ت. (میلاد تیموری)

ناشر: انتشارات طغرل

117 صفحه

چاپ اول 1398

شابک: 9-180-486-600-978

بیلیندیگی کیمی، آذربایجان تورک ادبیاتیندا یئنی ساتیریک جریانین قوروجوسو و بایراقداری اولان میرزا علی اکبر صابرین ( 1911-1862) آذربایجان،ائله جه ده عموم تورک ادبیاتیندا، مستثنا یئری واردیر. صابر، یوکسک صنعتکارلیغی ایله، انقلابی، رئالیست، درین و ملی مضمونلو اثرلی ایله ادبیاتیمیزدا، مدنیتیمیزده، ملتیمیزین اجتماعی - سیاسی دوشونجه سینده درین ایزلر قویموش، ادبیات تاریخیمیزده مستثنا و شرفلی بیر یئر توتموشدور. اونون «هوپ هوپ» آدلی اونلو شعر توپلوسو ملتیمیزین ان سئویملی شیرین کتابینا چئوریله رک دیل لرین ازبری اولموشدور. ایگیرمینجی یوزایل لیگین باشلاریندا، صابر، یالنیزجا آذربایجاندا دئییل، عموم تورک دونیاسیندا، ائله جه ده اسلام و اورتا شرق عالمینده قاباقجیل و مودئرن دوشونجه نین، اجتماعی - سیاسی ساتیرانین انکشافینا جدی تاثیر گؤسترمیش؛ اودلو قلمی ایله بو اؤلکه لرده یارانان ملی اویانیش و ملی آزادلیق حرکاتلارینا دستک وئرمیش، آزادلیق مبارزلری نین سئوملی شاعرینه چئوریلمیشدیر.

1911 - جی ایلده، بؤیوک آذربایجان تورک متفکری، خالق شاعری، صابرین واقتسیز اؤلوموندن سونرا اونون حال ترجمه سی و اثرلری بیر چوخ آراشدیریچینی ماراقلاندیرمیشدیر؛ بو ایشه تشبث ائدن ایلک کیشی ایسه اونون همکاری، دوستو و هم یئرلیسی، شاعر و ادیب عباس صحت اولموشدور. گونوموزه دک صابرله باغلی یوزلرجه مقاله و مونقرافی قلمه آلینمیشدیر و اونون حیاتی و یارادیجیلیغی نین چئشیدلی یؤنلری اله آلیناراق، ایشیقلاندیریلماغا چالیشیلمیشدیر.

صابر حاقیندا یازیلان ایلک علمی تدقیقات لاردن بیری ساییلماقدان اولان یوردسئورین بو اثری تورکیه تورکجه سیندن دوغما تورکجه میزه کؤچورولموشدور. بو ایشده اولا بیلدیگینجه اصل متنین اوریژینال اسلوبونا صادق قالماغا چالیشیلمیشدیر. بونون بیر «ترجمه» اثری اولمادیغینی وورغولاماقدا یارار واردیر؛ واقتیله صابرین ده سؤیلمه دیگی کیمی، تورکیه تورکجه سیندن دوغما تورکجه میزه اویغونلاشدیریلان متنلری ترجمه حساب ائتمگین یانلیش اولدوغو قناعتینده یک.

تیمور ت.

اورمو - یای 1396