دومانلی تبریز

محمد سعید اردوبادی

حاضیرلایان: نوراله پورشریف

ناشر: انتشارات آذر تورک

چاپ اول 1397

شابک دوره: 7-38-8343-600-978

محمد سعید اردوبادی 1872 ایجی ایلده آراز قیراغیندا یئرلشن اوردوباد قصبه سینده بیر ضیالی عایله ده دنیایا گؤز آچیب اردوبادی حیاتیم و محیطیم آدلی خاطره لر کتابی نین «فامیلیامیز» آدلی ایلک بؤلومونده عایله سی حاقیندا بئله دئییر:
« آتام محمد اوغلو حاجی آغا یئددی نسل گئرییه گئتدیگیمیزده شاه عباسین یانیندا بؤیوک بیر رتبه قازانمیش مشهور شاعر میرزه حتم اردوبادی نین نوه سیدیر. میرزه حتم و اونون آتالاری قاراباعین هکری (برگوشاد) بؤلگه سیندندیر. میرزه حتمدن آتام حاجی آغایا دک عایله میزه شاعرلیکه مشغول اولان یالنیز ایکینجی میرزه آغاجان اولموشدور.آتام حاجی آغانین لقبی «فقیر» اولوب، بؤیوک بیر دیوانی واردیر. آنام ایرانین قاراداغ بؤلگه سی نین دیزمار اوباسینداندیر. اوشدوبون کندینده پناه آدلی بیر باغبانین قیزیدیر. آنامین آدی ننه قیزدیر. او دا طووز خانیم واسطه سی ایله مشهور اوشدوبون شاعری نباتی ایله اقر بادیر. آ نام حسن اوو (حسن آباد) خانلاری نین هجوم و تالانلاریندان قورتولماق اوچون عایله سی ایله برابر ایراندان قاچمیشدی. آتام ائولندیگی واخت یوخسول بیر آدام ایدی. بو سببدن شعرلرینده دائما فقیر لقبیندن استفاده ائتمیش و بونونلا دا مشهور اولموشدو.»