لـیـمــانا دوغرو ...

بوتون شعرلر

اورخان ولی قانیق

حاضیرلایان: سعید موغانلی

چئویرن: سلیم باب الله

بیرینجی چاپ 1392

ناشر: انتشارات اولکر

شابک: 9-3-92124-600-978

اورخان ولی کانیک (قانیق)، یازین ایلک آیینین 13-جو گونو 1914-جی ایل، (1293/1/25)، استانبولدا دوغولدو، اورتا مکتبی بیتیردیکدن سونرا فلسفه رشته سینده عالی مکتبده تحصیل ائتدی. 1947-جی ایل یارپاق درگیسینی چیخارتدی، یارپاغین سون سایی سینی اورخان-ین دوست لاری «سون یارپاق» آدییلا و اونون خاطیره سی ایله ایل دؤنومونده چیخارتدیلار.

اورخان ولی، پاییزین اورتا آیی 1950-جی ایل (1329/8/24) استانبولدا، مغزینده باش وئرن قاناما الیزلیقی ایله 36 یاشیندا دونیاسینی دییشدی. او تورکیه ادبیاتیندا اؤنملی شاعیرلردن و یئنی شعرین اؤندرلریندن بیری دیر. اونون باره سینده چوخلو سؤزلر سؤیله نیب، واختی ایکن بو اونودولماز شاعیرین اؤلوم خبرینی ناظیم حکمت زنداندا ائشیتدیکده چوخ کدرله نیب و بیر گون سسسیز و دانیشمادان دوشونور.

اورخانین 6 شعر توپلوسو و باشقا شعر- اؤیکو ترجمه لری ادبیات انگینلییینده همیشه پارلایاجاق.

اورخان ولی قانیق، قالاتا سارای مدرسه سینده باشلایان تحصیلینی آنکارادا دوام ائتدیریب،1932-جی ایللرده استانبول بیلیم یوردونون ادبیات دانشکده سی فلسفه بؤلومونده تحصیلاتینی باشا یئتیریب. آنکارا پست سیستمینده مامور ایشله ییب، سربازلیغینی باشا ووردوقدان سونرا (1945) ترجمه بوروسوندا چالیشماغا باشلامیش. 1947-جی ایلده «قورومدا آنتی دموکراتیک هاوا حس اولونماغا باشلادی» سؤیله یرک گؤره ویندن استعفا ائدیب، ایلک یازیلارینی درس ایللرینده چیخاردیغی «سسیمیز» آدلی مکتب درگیسینده و داها سونراکی شعر و یازیلارینی ایسه «انسان»، «سس»، «گنجلیک»، «انقلابچی»، «کوللوک» درگی لرینده نشر ائدیب. 1947 جی ایلدن ترجمه یه اوستونلوک وئرن اورخان ولی «م.آ.آیبار» رین چیحاردیغی «حر»، «زنجیرلی حُریت» آدلی قزئت لرده آراشدیرمالار، تنقیدی یازیلار، «اولوس» دا ایسه «سفر قیدلری» باشلیقلی مقاله لر درج ائله تدیریر. 1941 -جی ایلده درس یولداش لاریندان اولان «اوکتای رفعت، ملیح جودت آندای» لا بیرلیکده «غریب» آدلی شعر کیتابینی نشر ائتدیره رک تورک شعرینده بیریئنیلشمه حرکاتینین اساسینی قویور.

یانوار 1949-جی ایل تاریخیندن اعتبارا هفته آشیری نظرده توتولان «یارپاق» درگیسینی نشر ائتمه یه باشلاییر. 15 اییون 1950-جی لییه قدر نشر اولونان بو درگی مالی سیخینتی لاری اوزوندن نشرینی دایاندیرینجا اورخان ولی ده آنکارادان استانبولا گئدیر. اورخان پاییزین اورتا آیی 1950-جی ایل (1329/8/24) استانبولدا، مغزینده باش وئرن قاناما آلیزلیقی ایله 36 یاشیندا حیاتا گؤز یومور. شاعیرین یایینلادیغی درگی، «سون یارپاق» آدلانان اؤزل سایی کیمی دوستلاری طرفیندن شاعرین وفاتی گونلرینده یایینلانیر.

اورخان ولی نین اشتراکی ایله نشر اولان اثرلر: شعر کیتابلاری-«غریب» (1941)،«واز کئچمه بیلمه دیییم»(1949)،«یئنی سی»(1947)،«قارشی» (1949)، «بوتون شعرلری»(1951)، «نشر یازیلاری»(1953)، «ادبیات دونیامیز» (1975)، بونلاردان باشقا اورخان ولی نین «لافونتاینه ناغیل لاری». «نصرالدین خوجا حکایه لری»،«شوکت رادویا مکتوب لار»، آدلی کتاب لاری، ائله جه ده «مولانا رومی» دن، «موسسه»،«مولییر»،«شکسپیر»،«لئساج»،«تورگینوو»،«گوگول»،«سارتر»دان ائتدیی چوخ سایلی ترجمه لری و هم آیریجا اثرلر، کیتاب شکلینده و هم آنتولوژی کیمی یایینلانمیشدیر. اورخان ولی نین شعرلری و ادبیاتلا باغلی یازیلاری، انگلیس، فرانسه، روس،قازاق، اؤزبک، آذربایجان، یونان، ایتالیا، عرب، ژاپن و فارس دیللرینه چئوریلمیشدیر.

سعید موغانلی / قیش 1390