زکیه ذولفقاری
1341-جی ایلده مهرین ۱۵-ی تبریزده چوستدوزلار محله‌سینده بیر مؤمن عائله‌ده آنادان اولموشام. آتا -آنامین اصل -کؤکو ورزقانین شرفه کندیندن اولسا چوخ کیچیک یاشلاردان تبریزه کؤچوب اوردا یاشایبلار. من‌ایسه اوچ یاشیندا عائله‌مله بیرلیکده مرنده کؤچوب، اوردا یاشاییرام.
یازیب-اوخوما هوسی منده چوخ کیچیک چاغلاردان باشلاییب دوام ائتسه ده، آنجاق نه یازیق آنادیلیمده اوخویوب یازماغی چوخ گئج باشلامیشام.
1390- جی ایلدن ائل‌بیلیمی موسسه‌سی و اوردا اولان اوستادلار، اؤزللیکله اوستاد صرافی جنابلاری‌نین تشویقی‌یله فولکلور ساحه‌سینده ایلک یازیمی باشلاییب و ائل‌بیلیمی نشریه‌سینده بعضی ناغیل‌لار، عادت- عنعنه‌لر ، فولکویازیلار و س. یازیلاریمین چاپ اولماق سعادتینی تاپمیشام.
و ... او مقدس اوجاقدان یولا چیخمیشام.
ایلک ترجمه‌م، فریبا خانیم وفی‌نین" حتی وقتی می‌خندیم" کتابی، "گولرکن بئله" آدیندا،1395-ده، یاییلیب.
اوریانا فالاچی‌نین "نامه به کودکی که هرگز زاده نشد" کتابی،" دوغولمایان اوشاغا بیر مکتوب" آدیندا، 1359-دا، "آذر تورک و نباتی" یاییم ائوی‌نین اَلیله نشر اولدو.
دکتر رضا براهنی‌نین" رازهای سرزمین من" کتابی ، ایکی جیلده، " اؤلکه‌مین سیرلاری" آدیلا ترجمه سی، تاسفله هله مجوز آلا بیلمه‌ییب.
فیروزبگ مصطفا‌نین " دنیز کؤچو" پوئیستی‌نین کؤچورمه‌سی 1398-ده "سونا" یاییم ائوینده ایشیق اوزو گؤردو.
"سون قرار" حکایه توپلوسو کتابیم 1399-جی ایلده، یئنی قاپی سایتی‌نین زحمتیله، "یاس بخشایش" یاییم ائوینده ایشیق اوزو گؤروب.
میر جعفر پیشه وری نین "نادره" رومانی نین ترجمه سی 1400-جی ایلده "آذر ترک" یاییم ائوی طرفینده ایشیق اوزو گوردو.
قدیم تورکلر تاریخی"لئو گومولییف" اثری‌نین کؤچورمه‌سی ده بو تئزلیکده ایشیق اوزو گؤره‌جک.
چوخلو ایران و دنیا مشهور قادینلاری‌نین قیسا بیوگرافیلاری، بعضی یازیلاریم، ناغیل‌لاریم، مختلف نشریه‌لرده، سایتلاردا ، کاناللاردا، او جومله، سانجاق، بئش‌داش ، ادبیات سئونلر کانالی و س. یئرلرده یاییملانیبدیر.
یولوموز اوزوندور، عؤمورلر قیسا!
