بیردن نسه باش وئردی،هئچ بیری، هئچ بیر شئی آنلامادی: قاییق سولا یاتدی،کوپوکلو سو ایچری دولدو، آز قالا دیزارینه کیمی، عینی زاماندا ویییلتی قوپدو، غفیل کولک نهنگ قامچی کیمی باشلاری اوزه رینده شاققیلداییب، محمودون قولاقلی پاپاغینی گویه قالدیریب سویا چیرپدی: آدامین ایلییینه ایشله ین اوچونو ده آز قالا دوندوردو،اوچونون ده ایچی – ایچالاتی، سوموکلری گیزیلده دی. سونرا هر شی قورتاردی، داها دوغروسو، باشلامامیش قورتاردی. چونکی هئچ بیر آن دا کئچمه دی کی، قاییق دوزه ادی و اطرافدا نه واردیسا اولکی حالینی آلدی. موتور تاققا – تاراقلا ایشله ییردی، تاتار تئمیرین قاییغی منزیل باشینا گئدیردی.