تبریزلی میر یوسف نجمی

متن کامل

تبریزلی میر یوسف نجمی
رضا همراز
هله 10- 12 یاشیم اولار اولماز ، رحمتلی آتام هردن ائوده اوز- اوزونه میزیلدایب بیر شئی لر اوخویاردی . اوز اوشاقلیق دونیامدا اونلاری ذهنیمه یغیب ، منده اوز اوزومه ائله اوخوماغا  ، یاداها دوغروسو یامسی لاماغا باشلاردیم . اما بیر گون آتام ایندی دئمه سین دئدی : اوغلوم سن منه باخما بونلاری اوخورام سن اوخوما ! ائشیکده اوخویاسان آجانلار توتار ! عاقلیما چاتار -چاتماز دئدیم بو نه دی کی ؟ به رادیودا نئجه اوخورلار !
دوز دو اوخورلار اما سن سوزه باخ . او اوخونانلار بونلاردان دئییل ! ائوده اوخو ائشیکده یوخ ! هئچ بیر سوز دئمه دن سوسدوم ! اما هردن ائله بو اوره یه یاتان ماهنی نی اوزل بیر ریتم ایله اوخویاردیم اوز عالمیمده .
 آی لار دولاندی – ایللر دولاندی  دیرلی آذربایجان گونده لیینین بیر سیرالارین وراقلارکن ، همین ماهنی یا راستلاشدیم . تعجب له بیر نئچه دونه اوخودوم . شاعیرین ایسه تانیدیم . من رحمتلی اوستاد سید یوسف نجمی نی ادبی درنک لرده گوروب شعرلرین دینله میشدیم . او عالی جناب آز شعر اوخویوب ، آز دانیشیب ، چوخ قولاق آسانلاردان ایدی . بیز گنج لر اونو بیر مرثیه شاعیری کیمی تانیاردیق . حالبوکی ، اونون دادلی - دوزلو غزللری ، بوشقابا قویمالی میللی شعرلری هابئله اورک یاندیریجی مرثیه لری ده اولموشدور . نه یازیق عاقلیمیزا چاتمادی کی اونونلا اوتوروب خاطره لرین ائشیدک ، گومان کی باشقالاری دا بو فیکره بیزیم کیمی دوشمه دی لر !!! ائشیتدییمیزه گوره اونون بیر نئچه دفتر تورکجه – فارسجا غزلی ایله قات – قاریشیق شعرلری وار کی هله گون ایشیغینا چیخمامیشلار . البته اونلارین بیر سیراسینا میللی حوکومت دوورو نشر اولان مطبوعاتدا یئر وئریلمیشلر . اوموروق بیرگون تام غزللری ، میللی شعرلری ایله برابر باشقا شعرلری ده بیر دیرلی تحفه کیمی آذربایجان ادبیاتی وورغونلارینا ارائه اولونسون انشاالله . علی اکبر اوغلو سید یوسف نجمی گونش ایلی 1299 دا آنادان اولوب ، گنج ایکن تبریز دانشگاهینا استخدام اولاراق ، اورادان ایسه امکلی اولموشدور .اوستاد نجمی نین بیر سیرا نوحه کیتابلاری « نجم آلاثار »  عنوانی ایله نشر اولموشلار . دئمه لی یم بو بویوک شاعیریمیز  1372 ینجی ایل 73 یاشیندا دوغولدوغو شهر تبریزده دونیاسین دگیشیب ، همین شهرین تایی گورونمز مزارلیغی اولان مقبره الشعرادا اوزون تورپاغا قویموشدور . نه یازیق کی مقبره الشعرانی سوکوب ، دوزه تمک نیتینده اولانلار بیر سیرا شاعیرلرین سور – سوموک لرین ، او ذات عالی ایله برابر پیچتله یب ساخلایب لار تا بلکه بیر گون یئنی دن تورپاغا گئتدی لر ! غریبه دیر کی بو اوستاد شاعیریمیزین وفاتیندان سونرا اونون یار – یولداشلاری سانکی بونو اونوتدولار ! نه بیر مقاله ، نه آدین توتان ، نه بیر عزیزله مه  ، نه بیلیم نه ده نه ! سانکی بو مسئله یه شاعیر اوزو حیاتیندا واقف اولموشدور . نییه کی  اوز شعرلرینده بئله ترنم ائتمیش :
آنانکه یاد مرده ای صد ساله می کنند                                           در ماه دی خیال گل و لاله می کنند
کسی یاد من نمی کند ، امروز زنده ام                                           فردا برای مردن من ناله می کنند
مرده پرست و زنده کشند این رفیق ها                                         هشدار ! زیر پای تو را چاله می کنند ...
دئدییم خاطره نی جانلاندیرماق اوچون همین ماهنی یا خود آذربایجانین مللی سرودونو  سیز عزیزلره ده تقدیم ائدیرم .
همه شه لیک یاشا آذربایجان
آنا یوردومسان ای شالی وطن                                             همه شه لیک یاشا آذربایجان
گولوم بولبولوم گولشنیم وطنینم                                         همه شه لیک یاشا آذربایجان
*
قوم لارین لعل دیر داشلارین مرجان                             سولارون دُر دور گول لرین ریحان
شرافتلی آددین دور  آذرستان                                     همه شه لیک یاشا آذربایجان
*
یئر اوزونده سن گوزل بیر گول سن                سنده ساچیب دیر انتقام پرچمین
شئرلرین مسکنی سن سن یقین                                همه شه لیک یاشا آذربایجان
*
یولوندا اولمک دیر عین سعادت                            قهرمالار آناسیسان  حقیقت
سالیب دور اوستونه سایه عدالت                          همه شه لیک یاشا آذربایجان
*
آخیب دیر سو کیمی اوستونده قانلار                    یولوندا جان قویوب چوخلو جوانلار
او قانلاری آلاجاق قهرمانلار                                     همه شه لیک یاشا آذربایجان
*
چاتیب دیر باش باشا اوجا داغلارون                    جنت کیمی بزنیب دیرباغلارون
سینه دن آز قالیر گئده داغلارون                       همه شه لیک یاشا آذربایجان
*
دریا کیمی موجه گلیب گوللرین                              آسلان کیمی آزاد یاشار الرون

آچیلیب دیر چیچک لرون گوللرون                         همه شه لیک یاشا آذربایجان .

قایناق :
1-   آذربایجان گونده لییی ، شماره 12 – ایکینجی دوره – سه شنبه 3 مهر 1324 -  تبریز
2-  شاعیریمیزین الیازمالاری . نشر اولونمامیش مسوّده لر

1 مهر 1398
تعداد بازدید: 525

نظرات

دسته بندی محصولات
ارائه کنندگان
مرورگر شما بسیار قدیمی است!
جهت مشاهده این وب سایت به صورت صحیح، بروزرسانی مرورگرتان ضروری خواهد بود. بروزرسانی مرورگر
×