عشق
عشق
رومان
(آذربایجان تورکجه سینده)
الیف شافاک
تورکیه تورکجه سیندن چئویرن: نریمان عبدالرحمانی
ناشر: نباتی نشریاتی
بیرینجی چاپ 1397
432 صفحه
شابک: 1-48-8690-600-978
بوندان اوزون زامان اول لر ایدی، بیر رومان دوشدو کؤنلومه، «عشق شریعتی». یازماغا جسارت ائله یه بیلمیردیم. دیلیم لال اولدو، قلمیمین اوجوسا کور. قیرخ سوبا چؤرک یئمه یه گؤندردیم اؤزومو. دونیانی دولاشدیم. انسانلاری تانیدیم، احوالاتلار توپلادیم. اوزریمدن چوخ باهالار کئچدی. سوبالاردا چؤرک قالمادی، من هله ده خام، هله ده عشق ده اوشاق کیمییدیم ...
«خاموش» دئردی مولانا اؤزونه. یعنی «سوسقون». شاعرین، هم ده آدی - سانی دونیانی بوروموش بیر شاعرین، یعنی ایشی - گوجو، وارلیغی، شخصیتی، حتی اوددوغو هاوا بئله سؤزلردن تشکیل اولونان، الی اله بوندان دا چوخ محتشم مصراع لارا امضا آتمیش بیر انسانین، نئجه اولوب، اؤزونه سوسقون آدینی وئردییینی هیچ دوشوندومو؟! ..
کایناتین دا عینی له بیزیم کیمی شیلتاق قلبی و آهنگدار اورک دؤیونتوسو وار. نئچه ایللردی، هارا گئدیرمسه گئدیم، او سسی دینله ییرم. هر بیر انسانی یارادانین امانتی گیزلنمیش جوهر ساییب، دانیشدیقلارینا قولاق آسدیم. دینله مه یی سئودیم. جمله لری، سؤزلری و حرفلری ... اما منه بو کتابی یازدیران بوتؤو سکوت اولدو.
«مثنوی» نی شرح ائدنلرینین چوخو دقتی بو اؤلومسوز اثرین «ب» حرفی له باشلادیغینا چکیر. ایلک کلمه سی «بشنو!» دی. یعنی «دینله!» آدی «سوسقون» اولان شاعرین ان قیمتلی یازدیغینی «دینله!» دئیه باشلاماسی تصادفدومو دئییرسن. دوغرودان دا، سکوت دینله نه بیلرمی؟
بو رومان دا هر بؤلمه عینی صامت له باشلاییر. نه اولار، «نه یه گؤره ؟» سوروشما. جاوابینی سن تاپ. اؤزونده ده ساخلا. چونکی بو یول لاردا ائله حقیقت لر وار، دانیشاندا بئله سرّ کیمی قالمالیدی.
ع.ز.زاهارا
آمستئردام 2007