وطن سنه قوربان اولوم کتابینین ایلک تقدیماتی« اوز آچیلیشی»

بايرام آيی نین «اسفندین» 10-نجو گونو  ائل اوزانی اوستاد عاشیق قافارین وطن سنه قوربان اولوم آدلی کتابینین  طنطنهلی ایلک تقدیماتی کچیریلدی.  مراسیمده  عاشیغین بوتون عائله عضولری، آذربایجانین  تانیمیش مدنیت و ادبيات خادیملری اشتیراک ائتمیشدیر. 
ائوده آل کتاب ساتیشی مرکزینین  باشچیسی، چالیشقان گنج ،نوید محمدینین بؤيوک امه يی و آپاراجیلیغی لا کئچیریلن بو تقدیماتین ایلک چیخیش ائده نی تانیمیش ضیالی اوستاد منوچهر عزیزی اولدو. 
يئری گلمیشکن دئمه لی-يم مهندیس صرافینین عاشیق قافار بار ه ده  يازدیغی چوخ ديَرلی يازیسی آپاریجی طرفیندن اوخوناراق، اشتراکچی لارا چاتدیریلدی. 
داها سونرا تورک-فارس ادبياتیندا اؤزونه مخصوص يئر آچان دوکتور صمد رحمانی جبابلاری عاشیق ادبیاتی حاقدا دانیشدی.عاشیغین لياقتلی اوغلو ،آتاسینین شعرلریندن بیر نئچه سینی دويغوسال حالدا سازین اینجه تئللرینده سس لندیره رک مجلیسه اؤزل ياراشیق وئردی. 
ائل بیلیمی آدیندان اوستاد احد فرهمند سؤزو گئدن کتابین اؤنملی مقاملارینا توخوناراق،بو اوتورومون نه اولدوغونو بؤيوک باجاریقلا گؤستره بیلدی 
وارلیغیمیزی اؤز سازی، سؤزو ایله دايیما ایشیقلاندیرماغا چالیشان عاشیق جبرئیل خلیلی همیشه اولدوغو کیمی بو مراسیمی گوللندیردی. 
عاشیق قافارین سئویملی نوه سی آيناز رحیم زاده حزین بیر ماهنیلا اوزانیمیزین ابدی گئدیشینی بیر بیر داها خاطیرلاتدی. 
مجلیسین سونوندا اوستادین صداقتلی عؤمور-گون يولداشی پاکیزه خانیم سؤزون اصلی آنلامیندا سئودا خانیم ائلیمیز طرفیندن عاشیغا وئریلن يوکسک ديَری دیله گتیردیکدن سونرا مجلیسی قورانلاردان و اشتراکچیلاردان اؤز عائله سی آدیندان تشکور ائتدی. 
مراسیم بیر نئچه قلم صاحبینین حضوری و بعضی عائله عضولرین اولمالاریلا وطن سنه قوربان اولوم کتابینین اوز آچیلیشیلا سونا چاتدی .
بو اؤن آچیلیش تؤره نینده بیر سیرا قلم صاحبلری، شاعر، موسیقی خادیملری چیخیش ائتمسه لرده اونلارین حضوری  بو مجلیسه اؤزل ياراشیق وئرمیشدیر. دوکتور حسین فيض الهی وحید، بهروز ایمانی ، رضا همراز، سوسن  خانیم نواده رضی، علی خالط آبادی مهندس يوسف کوکبی، علیرضا بیریا، ععسگر اسدی ،شهرام زمانی و آيریلارینی گؤسترمک اولار. 
کتابین ایشیق اوزو گؤرمه سینده يازیچی-شاعر، آيدین ساو نشر ائوینین سوروملو مدیری نورالدین مقدم-ین بو کتابین آز زاماندا، يوخاری سویه ده   ایشیقلاندیرماسی اولدوقجا تقدیره لايیقدیر..

سايغیلاریملا: بهروز ایمانی -11-12-1397 تبریز.