سونونجو درویش
سونونجو درویش
کنعان حاجینین اؤز حیاتینا توتدوغو گوزگو
نجف عسگرزاده
کؤچورن: ائلیار پولاد
يازماق. حیاتین بیر پارچاسی. عذابلارا قارشی مبارزه.
يازماماق. بوغولماق. نفس آلماغا تشنه اولماق.
يازا بیلمهمک. ياشاماق و اؤلمک آراسیندا ياشادیغین آنلارین اؤلومسوزلويه چئوریله بیلمهمهسی.
رومان - جمعیتین گوزگوسودور.
رومان. جمعیت. استاندالی خاطرلايیرام. او دئيیر: «رومان - جمعیتین گوزگوسودور». باخیرسان و گؤرورسن. گوزگولر ده فرقلهنیر. کئچمیشی گؤسترن گوزگولر. گلهجهيی گؤسترن گوزگولر.
درویشین گوزگوسو.
درویشین مسکنی اولمور. گزیر - دولاشیر درویش. بیر يئرده قرار توتا بیلمیر درویش. حیاتین رنگارنگلیی ایچینده اؤز رنگینه بورويوب يولونا داوام ائدن درویشین جیبیندهکی گوزگوسو تکجه اونو دئيیل، اونون اطرافینداکی باش وئرن حادثهلری ده عکس ائتدیریر. کئچمیشده اولانلار بو گوزگو واسطهسیله گلهجهيه، گلهجک نسله اؤتورولور. درویشین گوزگوسوندن.
درویشلیین سونو. هر شئي بیتدیمی؟
سون. سونونجو. درویشلیین سونا چاتماسی. اوزون سفردن سونرا گئریيه بوراخیلان خاطرهلرین و گئریده بوراخدیغی انسانلارین بیر چوخونون عؤمرو سونا چاتیب. چاتیب دئدیم، اما بوتون بو خاطرهلری تشکیل ائدن حادثهلر و خاطرهلر توپلوسو آرتیق ایللردی درویشین گوزگوسونون ایچینه هوپوب و اورادا ياشايیر. اورادا اؤز اؤلومسوزلويونه بورونوب.
رومان و حقیقت. حقیقتین کیچیک بیر حیصهسی گئرچکلیک
رومان گوزگودور دئدیک باياق. گوزگو هر شئيی گؤستریر. حقیقت و يالان عکس اولونور گوزگوده. حقیقتین کیچیک اوغلو گئرچک. حیات رئالدیر. گئرچکدیر ياشادیقلاریمیز.
گئرچک رومان. رومانلاریمیز نه قدر اولماسا دا، گئرچکلری (حقیقتی دئمهدیم کی، هلهکی گئرچکلری بئله يازماغا، چوخ واخت گوجوموز يئتمیر) يازماغا چکینیر. فقط بو ياخینلاردا اوخودوغوم کتابین اوزرینده «گئرچک رومان» سؤزو منی دوشوندوردو.
رومان- گئرچکلیین تخييولو
يازماق. بوسبوتون گئرچکلری اورتايا قويماق. اؤزونه بئله اعتراف ائده بیلمهيهجهيین پئشمانچیلیقلاری، سهولری يازیيا چئویریب، گناهلاردان آریناراق ياشاماق چاباسی گئرچهيین ایچینده تخييول قورماغا بنزر. تخييولون گئرچکلیی حقیقته دؤنوشدوردويو کیمی، گئرچکلیک ده تخييولو اؤزونه هوپدوراراق ياشامینی داوام ائتدیریر. گئرچکلیک اورتادادیر. تخييول ایسه بئيینده. بونلارین بیرلشمه نقطهسی رومانا چئوریلیر. رومان ایسه جمعیتین گوزگوسو اولدوغو قدر، يازیچینین دا گوزگوسودور.
يادداش کارتی(کنعانین رومانیلاریندان بیرینین آدی دیر)
حادثهلر بورولغانی. مرکزده انسان. طالعین اونون اوچون قوردوغو حیات لابیرینتیندن چیخیشی آختارا-آختارا ياشايیر انسان. ياشادیقلاری يادداشینا حکّ اولونور. زامان کئچیر. ياش اوستونه ياش گلیر. يادداش ایسه ياشانانلاری زامانلا اؤز کارتینا کؤچورور. بیر گون ایسه واخت يئتیشیر. ياشانانلار يادداش کارتینا سیغمیر. کارتدان کؤچورولمه باش وئریر. يازیيا. يازی ایسه اعتراف دؤشونور.
کنعان حاجی - حیاتی ادبیاتا دؤنموش آدام.
يازیچیدیر کنعان حاجی. ياشادیقلارینی يازیر. سؤزون صرافیدیر کنعان حاجی. قوردوغو دیل ایله اوخوجونو کتابا کیلیدلهمهيی باجاریر. کنعان حاجینین يادداش کارتی وار. اونودولانلاری، اونودولماق ایستهنیلنلری يئنیدن خاطرلادیر. درویشدیر کنعان حاجی. هئچ يئرده قرار توتا بیلمیر. درویشلیک آزادلیقدیر هم ده. کنعان حاجی آزاد اولماق ایستهيیر. هرمان هئسهنین کنولپ اوبرازینی خاطرلايیرام. کنولپ دا بیر نوع درویش ایدی. گزیب-دولاشیردی. آزاد ایدی. قوشتک. سمادا.
اما هر شئيین سونا چاتدیغی کیمی درویشلیکده سونا يئتدی کنعان حاجی اوچون. آرتیق گئریده خاطرهلر وار. و بو خاطرهلر يادداش کارتیندا يئر توتوب اؤزونه خيلی واختدیر.
سونونجو درویش- کنعان حاجینین اؤز حیاتینا توتدوغو گوزگو.
ياشايیریق. ياشاماق قاورامی ديَیشیر انساندان انسانا. حیاتی گرک ائله ياشاياسان کی، عؤمرون ادبیاتا چئوریله بیلسین.
کئچمیش. آرخادا بوراخیلان انسانلار، اونو بوراخان انسانلار. پئشمانچیلیقلار. سئوینجلر. اوغورلار و اوغورسوزسوزلوق. گئریيه يول يوخدور. چیخیش باغلیدیر. و ادبیات دادا چاتیر. کئچمیش و يادداش تاندئمی.
يازیر. باکیدان دانیشیر يازیچی. کهنه باکی ایله ایندیکی باکینی مقایسه ائدیر ترزی ده. اؤزونون کئچمیشه عاید اولدوغونو وورغولايیر. کئچمیش باکینی سئویر. خوشبختلیین او ایللرده اولدوغو دئيیر. داریخیر باکی اوچون. کندی اوچون. بوزوونا اوچون. آتا و آناسی اوچون.
يازیر. رحیمآغا معلمدن. ایلک معلمیندن. ایللرینی ادبیاتا صرف ائدن، ایندی اونودولموش معلمینی يادا سالیر. گلهجک نسیل اوچون. اونون ائتدیکلرینی، ادبیاتا تحفهلرینی خاطرلايیر بیر-بیر.
يازیر. عائلهسیندن. نئفت بوروقلاریندا ایشلهين آتاسیندان. اونونلا بیرگه نئفت داشلاریندا قیسا ایش دؤنهمیندن. معلمه اولان آناسیندان دانیشیر. اونلار قارشیسیندا اؤولاد بورجلاریندان. اونلارا يئتری قدر دستک اولا بیلمهمهسینی آجی ايلا وورغولايیر اثر بويو.
يازیر. دوستلاریندان. اونا دستک اولانلاردان. دوستلاریندان بیرینی تئز اونوتماسیندان. يادا سالماماسیندان پئشمانچیلیق دويور دوستونون ائوینه باش چکنده اؤلوم خبرینی ائشیتجک. باجارمیر، باجارمیر گئریسینی يازماغا...
يازیر. گنجلییندن. هئچ نه دوشونمهيیب، خوشبختلیین يئللهنجهيینده يئللهنن واختلاریندان.
يازیر. عسگرلییندن. آناسینی تک قويماسینین اورهیینی داغلاماسیندان. مکتوبلار ایله ایفاده ائدیر آناسینا سئوگیسینی اوغلو.
يازیر. آتاسی رحمته گئدندن سونرا آناسی ایله کئچیردیی چتین ایللرین آغیريوکلو گونلریندن. ایشسیزلیین گتیردیی چارهسیزلیکدن سیغیندیقلاری قاراژین سويوقلوغونو ایلیکلرینده حس ائده-ائده خاطرلايیر کئچمیشین آغیر گونلرینی.
يازیر. کتابسیز قالدیغی ایللردن. بوشلوغا دوشوب هر شئيدن سويودوغو، معنا وئره بیلمهدیی حیاتین عینی گئدیشلی يئکنسقلییندن. معناسیزلیغین طنطنهسی آلتیندا قالیب دا چیخیلمازلیق دالانینا ایلیشدیی گونلرده دوستونون اونا ال توتماسیندان.
يازیر. سیغیندیغی کتابلاردان. دؤرد بیر طرفینی احاطهلهين کتابلارین يولداشلیغیندان.
يازیر. بالاجا بیر داخمايا سیغینیب اورادا کئچیردیی گونلرین آجیسیندان. آجیسینا رغماً مبارزهسینی داياندیرمايیب، يازماغا داوام ائتمهيیندن.
يازیر. کئچمیشیندن. باباسینین ایراندان بو تايا کئچمهسیندن. آناسینین جنوبی آذربایجان دردی ايله عؤموربويو ياشاماسیندان. ایللر سونرا آناسینین گئتمهلی اولدوغو ایرانا سفریندن. اردبیلده باشینا گلنلردن.
يازیر. تورکيهدن. استانبولون اسرارانگیز گؤزللییندن. اورادا تانیش اولدوغو ادبیات آداملاریندان.
يازیر. اونودولموشلاردان. اوزه چیخا بیلمهينلردن. تئز پارلايیب، تئز سؤننلردن.
يازیر. يازدیقجا يادداش کارتینین بوشالیب يئنیدن دولماسینا شاهد اولور. اول خاطرلامادیغی حادثهلرین غفلتاً يادا دوشمهسی. خاطرلادیغی حادثهنین باشقا بیر ياخین انسانین دئمک اولار کی، فرقلی خاطرلاماسینی قئيد ائدیر تعجبله.
يازیر. اعترافلاری. اوزه چیخیریر بعضی گئرچکلری. آرینیر. تمیزلهنیر. کئچمیشدن بیر نوع قورتولور. اؤز-اؤزويله باش-باشا قالیر.
يازیر. درویشلیین سونا چاتماسیندان. درویشین گوزگوسوندن اؤزونو گؤستریر بیزه.
يازیر. هله ده يازیر. و هله ده يازماغا داوام ائدهجک. درویشلیک حیاتدا سونا چاتسا دا، يازماقدا درویشلیک داوام ائدیر.
پ. س. انسان. او، حقیقتین گئرچکلیک پايیدیر.
رومان. او، گئرچکلیین نیشانهسیدیر.
گوزگو. او، گئرچکلیین آتاسیدیر.
حقیقت. او، گوزگودور. چیرکینلر حقیقتی سئومز.
يازیچی. او، حقیقتی آختاراندیر ایللر بويو. گئرچکلیی تخييولله ایفاده ائدهرک حقیقتی ياراداندیر.
تخييول. او، گئرچکلیک ایله انسان آراسیندا بوشلوغون دولدورولماسیدیر.
تانری. او، حقیقتدیر.
...و انسان – او، تانریدیر؟