وای گئجه دن

عبدالله فرجی «اینجیک»

ناشر: ساوالان ایگیدلری

بیرینجی چاپ 1399

353 صفحه

شابک: 5-673982-622-978

بو کتاب اوستاد «عبدالله فرجی» جنابلاری نین ایکینجی شعر کتابی دیر. او جنابین «چیلله» آدیندا بیرینجی شعر مجموعه سینی بوندان ایره لی اوخوموشوق.

«اینجیک» تحلصی له ائل ایچینده مشهور اولان زنگانلی شاعیر، بلکه ده شعرین اؤزوندن یعنی ادبیتیندن چوخ، اونون آنلام و محتواسینا دقت یئتیرن شاعیرلردن ساییلیر. دئمک اینجیک ین دانیشماغا و دئمه گه درین دوشونجه لی سؤزلری و ائشیدیب و یاشامالی تجربه لری واردیر.

شاعیرین شعرلرینی شعر آخشام لاریندا ائشیدیب، اونلا، کدرله نیب و مفکوره لر عالمینه قدم قویموشوق. ادبیاتیمیزین اینجه لیک لری و نیسگیل لری له تانیش اولموشوق و دفعه لرله وطن، انسان و طبیعت مساله لرینه دالمیشیق.

اینجیک زحمت لرله بوی آتیب، خالق ایله یاشاییب، خالق ایله گولوب، خالق ایله آغلاییب، و سونوندا فیکیرلی و دوشونجه لی مجرب بیر شاعیر اولوبدور.

اینجیک بیزیم چوخ آدلی سانلی شاعیرلریمیز کیمی، آکادمیک تحصیلات آپارمییب، چون بیزده آکادمی یوخ ایمیش و وار ایسه ده، آکادمی لرده شاعیر بسلنمه ییبدیر.

شاعیرلیگه درین دوشونجه، حساس روح و دردلی خمیرمایه، چکیملی حیات تجروبه سی، اینجه باخیش و دوغال بیر دیل لازیم دیر. بو ماتریال لاری خالقین آکادمی سینده بیشیرمک له شاعیر اولا بیلرسن.