بشرین حیاتیلا قوشا یارانان ناغیللارین کوکو چوخ قدیم زامانلارا قاییدیر. هله ایلکین انسانلارین بو حاقدا داش اوزرینده چکدیکلری شکیللر ایندی ده قالماقدادیر. اونلار گون باتاندان سونرا اود یاندیریب دووره سینده گیرده وار اوتوراراق ناغیل دئمکله واختلارین سووارلارمیش. بو قدر قدیملیگی اولان ناغیللار اوزلرینده انسانلارین آرزو و ایستکلرین تمثیل ائدرک، اونلارا تئجه یاشاماغی و نئجه داورانماغی اویرتمیشدیر. فیزیکی عالمده باش وئرمگی ممکن اولمایان اولایلار ناغیللاردا راحاتجاسینا اتفاق دوشور. اما بو افسانوی و تخیلی دئئیملرین آرخاسیندا انسان حیاتیندا اوز وئرن بیر چوخ حقیقتلر موجوددور. یئر اوزونده خئییرله شیرین، حاق لا ناحاققین زوراکیلیق لا عدالتین تاریخ بویو قارشی قارشی یا دوروب مبارزه آپارماغی ناغیللاردا اوزون داها قاباریق شکیلده گوستریر، همیشه بو دویوشلرین سونو دوزون ایری یه و ایشیغین قارانلیغا گوج گلمه سیله باشا چاتیر، بئله لیکله ناغیللارین شیرینلیگی و اور گه یاتیملیلیغینی قات – قات آرتیر.