توضیحات

تبریزلی علی اصغر دلریش غزل لری

• غلام رضا مخلص
• مقدمه: رضا همراز
• ناشر: قالان یورد
• چاپ اول 1398
• 141 صفحه
• شابک: 2-02-6765-622-978

هجری اونوچونجو هابئله اون دوردونجو عصرده یاشایان آذربایجانین بویوک، عین حالدا نسبتا ایتگین شاعرلرینین بیریسی ده رحمتلی کربلایی علی اصغر جورابچی دیر کی، شعر و ادب سماسیندا «تبریزلی دلریش» آدی ایله داها آرتیق تانینمیشدیر. او، تبریزلی حاج رضا صراف، تبریزلی حاج ابوالحسن راجی، تبریزلی حکیم میرزه علی خان لعلی، تبریزلی میرزه مهدی شکوهی مراغه ای، دربندلی میرزه محمد تقی قمری، تبریزلی کریم آقا صافی، خیاوانلی میر عبدالحسین خازن، تبریزلی محمد امین دلسوز، تبریزلی میرزه علی دلخون، عاشورا شهیدی میرزه احمد سهیلی، آیت الله میرزه محمد تقی حجه الاسلام «تبریزلی نیر» و کیمی قلمداشلاری ایچره نه ایسه لایقینجه تانینمامیشدیر هئچ، تذکره چیلرده دلریشین آدینا چاتجاق، بیر چوخ باشقا قدر شاعرلریمیز کیمی اونون دا آدینین یانیندا دوز گئچیب، یا بیر – ایکی سطره کفایت لنمیشلر! یالنیز دلریشین هم یئرلی سی اولان «اسرار علی شاه» اؤز تذکره سینده اونونلا گؤروش لریندن، مباحثه لریندن، ساوادیندان هابئله شعرلریندن اورنک وئریب بئله عبارت لرله دلریشدن ذکر قیلر: «شمسی است که از افق سخنوری طلوع کرده، قمری است که از برج دانشوری ظهور، دانایی که از بدو سخن، سخن را پایه از اوست، دارایی که از ابتدای کلام، کلام را مایه از او» دلریشین اثرلرین آرایب باخاندا، دوشونمک اولور کی، او مرثیه ادبیاتیمیزین ان گؤرکملی نماینده یا خود شاعرلریندن ایدی کی، قوجامان تبریزده آنادان اولوب، سالم هابئله ساکت بیر حالدا تبریزین بازاریندا تاجرلیک ائدر، هردن ده الینه قلم آلیب بیر شئی لر یازارمیش. دلریش بیر سیرا شاعرلرله اوتوروب – دوروب گاهدان اونلاردان الهام دا آلمیش دیر. تاسف له هله ده بو گونه کیمی بو اولو شاعریمیزین دوغوم تاریخی، اولوم تاریخی هابئله مزاریندان خبر وئرن اولمامیشدیر!
دلریشین شعرلری دولغون، گوجلو هابئله تاثیرلی اولموشدور. بو تاثیرلر اورا کیمی دیرکی، سوز مولکونون شهریاری آدلانان اوستاد سید محمد حسین شهریار ایله مشروطه دورونون بویوک شاعر میر عبدلحسین خازن خیابانی تبریزی و باشقالاری دا تاثیرده قرار تاپیب اونون شعرلرینه نظیره لر ایله بنزتمه لر یازمیشلار کی، هله ده دیللر ازبری اولموشلار.