توضیحات

حسرت چلنگی

(باکی یه سفر قیدلری و مشاعره لر)

• کریم مشروطه چی «سؤنمز»
• ناشر: درسا
• چاپ اول 1381
• 368 صفحه
• شابک: 55-6104-964

کئچمیشده آرا-سیرا درگی لریمیزده قیسا نثرلری اولموشسا دا، سؤنمزین بو گونه کیمی مستقل نثر کتابی اولمامیشدیر. اصلینده ده او، اوغلو فرهود اوچون یازدیغی بو داغینیق مکتوبلارین بیر گون توپلو حالده چاپ اولاجاغینا بئله فکرلشمه میشدی. لاکین گینه ده اوغلو و بیر نئچه یاخین دوستونون تشویقی و اصراری ایله نهایت، اونلاری سهمانلاییب، او تایداکی قلم دوستلاریله ائتدیگی مشاعره لرله برابر یایینا وئرمکده دیر.

1366 نجی ایلده سؤنمز دوستلوق جمعیتی طرفیندن دعوتلی اولاراق باکی یا گئتمیشدی، بو «حسرت چلنگی» ده همین سفرین خاطره لری، تاثراتی دیر. عینی زماندا، بو کتاب، شاعرین نبی خزری یه حصر ائتدیگی بیر دویغولو شعرین ده آدینی داشیماقدادیر.

سفره گئدنده شاهلار    چوخ اولار جلالی قارداش» دئمیشلر.

چوخلاری منیم کیمی سفره الی بوش گئدیب، الی بوش قاییدار. آنجاق سؤنمز بیزه بیر سینه سؤز گتیرمیشدیر. سفره گئدنده ده، باخ، بئله گئدرلر!

بیلدیگینیز کیمی، بو تایدا شعر گله نگی، نثره گؤره داها گوجلو اولموشدور. ناثرلریمیزسه چوخلاری اصلینده شاعرمیشلر. یانیلمازسام، دوکتور حسین دوزگونون 1360 نجی ایلده «گونشلی وطن یادداشلاری» یاییلاندان سونرا، سؤنمزین «حسرت چلنگی» گزی و خاطره لر سیراسیندا، آنا دیلده، ایکینجی نثر اثریمیز ساییلا بیلر.

«گول اکیپ، خار درن خلقیمیزین» درین یارالاری هارا، کؤکسونه سیغمایان قووشماق حسرتی هارا؟ ایگیرمی ایلده ایکی کتاب هارا؟

بو دا بیزیم، تک باشینا چکدیگیمیز دیل دردی قارداش!

بو دا ان بؤیوک حسرتیمیز!

بو دا «قوی قالانسین حسرتلر اوسته!»

علیرضا- صرافی

پاییز 1380