توضیحات

وطن حسرتی (خاطره لر)

• پروفسور حمید محمدزاده
• به اهتمام: رضا همراز
• ناشر: قالان یورد
• چاپ اول 1399
• 125 صفحه
• شابک: 7-36-6765-622-978

قدیم طب کتابلاریندا «حب الوطن» آدلی بیر خسته لیگین اولدوغونو اوخویاندا، دوغروسو بیر نوع شبهه لندیم، اؤز – اؤزومه دئدیم : «بو نه جور خسته لیک اولا بیلر؟ وطن سئوگیسی نه اوچون خسته لیک اولسون؟» سونرا دوشوندوم: عشقدن درده دوچار اولماق طبیعی دیرسه، وطن سئوگیسی ده درده چئوریله بیلر. عزیز بیگین مشهور «لیلی و مجنون» اوپراسیندا مجنونون آتاسیندان سوروشولور : «سؤیله بیر گؤروم، ای عرب! بو جوان نه دن خسته؟» جواب وئریر: «عشق دیر اونون دردی، اولوب لیلی یه عاشیق.» بلی عشقدن خسته لنمک طبیعی دیر. بو، ایسته گین شدتی، حسرتین، محرومیتین درین لیگینی گؤستریر. عشقدن بروزه وئرمک ایسته مه نیلری روانشناس حکیم لر خسته نین نبضینی توتوب، قونشولارین، محله لرین، کوچه لرین بیر-بیر آدینی چکمک له اورک دؤیونتولریندن اونون کیمه عاشیق اولماسینی تعیین ائدردیلر. «سیاحتنامه ابراهیم بیک» ده بو اصولدان فایدالانان حکیم، ابراهیم بیگین ایرانا عاشیق اولدوغونو معین لشدیریر.

یاشادیغیمیز عصرده مهاجرتلرین چوخالدیغی انسان لارین دوغما یورد لاریندان ایستر – ایسته مز آیری دوشدوک لری بیر شرایطده نوستولژی دئییلن بیر خسته لیک گئنیش یاییلمیش، بو اصطلاحا مطبوعاتدا تئز – تئز راست گلیر، رادیو – تلویزیوندا چوخ واخت اونو ائشیدیریک. منجه نوستولژی اوچون دیلیمیزده چوخ مناسب و یاخین اصطلاح «نیسگیل» اولا بیلر. نوستلژیده اولان بیر نئچه سس نیسگیلده ده واردیر. بو ایکی سؤز بیر کؤکدن اولماسا دا معناجه دئمک اولار عئینی دیر.

منیم بو یازی لاریم قیرخ ایل لیک غربتده قالیب، وطن، دوغمالار حسرتیله آی لاری، ایل لری سایاراق، وصال امیدیله یاشادیغیم چاغ لارین یادیمدا قالان یارپاق لاری دیر.