توضیحات

پیر و مغان

(دورد دفترلیک شعر)

• شاعر: مغان
• بیرینجی چاپ ایلی 1379
• بیرینجی دفتر: سلطان ساوالان
• ایکینجی دفتر: بابک
• اوچونجو دفتر: معاصر غزللر
• دوردونجو دفتر: معاصر سربستلر
• ناشر: انتشارات دانشمند
• شابک: 6-0-90948-964

اولو بیر داغین دؤشونده یاشاماغیم، قوهوم – قونشونون اونا تقدس گؤزیله باخماقلاری و هر سؤز باشیندا اؤیودلرینده، دعالاریندا و حتی قارغیشلاریندا، اوندان آد آپارمالاری همیشه منی او قوجامان داغین معنوی عظمتی حفینده دوشونمگه وادار ائدیردی، هامی یا بللی دیرکی خلق آراسیندا و هابئله زنگین ادبیاتیمیزدا، معنوی و حماسه مقامه مالک اولان انسانلارین آدلارینی آپارمادان قاباق اولارا لایق لقب لری و یا خلق اؤزو وئره ن آدلاری دئییب سونرا اؤز آدلارینی ذکر ائده ریک مثال اوچون:
شاه ختائی- قوچاق نبی – ایگیت بابک – خان چوبان و سائره
سلطان ساوالان و خان آرازدا، اؤز معنوی عظمت لرینه گوره ائل ایچینده بیر بؤیوک انسان کیمی، جانلی، شانلی و مقدس سانیلمیشلار و اؤزلری اوچون آدلاریندان قاباق سلطان و خان لقب لرین آلمیشلار. نسیل دن نسیله، دیلدن دیله، آتا – بابالاریمیزین سلطان ساوالان حقینده بیزه چاتان سرزلری، انسانی اونون گئچمیش عظمتی حقینده دوشوندورور، اونون هئیبت لی گؤرکمی گؤز اؤنونده جانلانیر هامی دا اونو یاخیندان گؤرمگه و زیارت ائتمگه ماراق یارادیر آنجاق تاسف لر اولسون کی بعضا چوخ مشتاقلارین بیر معشوق کیمی زیارتیندن محروم ائدیر.
من ایللر بویو، گئجه – گوندوز بو قدرتلی و عظمتلی داغ حقینده دوشونموشم، اونون ذیروه سینه قالخماق و یاخیندان زیارت ائتمک منیم رؤیالاریم و آرزولاریم اولموشدو آنجاق هر دؤنه ساعتلر تلاش دان سونرا دؤزوموم آزالیب و آیاقلاریم گئتمکدن قالیب ناکام، یورغون – آرغین قایتمیشدیم، اوتوز یئددی یاشاییش یازیمدا 1364 نجو گونش ایلی نین دی آینین اون یئددی سینده گئجه یاریسی، منه اوز وئره ن قلبی حمله، آی لار بویو منی سارسیتدی گئجه لر و گوندوزلر اوره ک سانجی سی چکمک و داوا – درمانیله عؤمور سورمک منی لاپ اُیاقدان سالیب، یاشاییشی گؤزومده آجی بیر حالا سالدی، بئله بیر وضعیت ده، بو ضعفه اؤستون گلمک اوچون ساوالانا گئتمگی قرار آلدیم و 12/4/65 ده همیشه لیک خیال و رؤیالاریم دوغرولدو و آرزولاریم یئرین آلدی یو موفقیت منده یئنی بیر قدرت و جرئت یاراتدی ایکینجی یول 30/6/65 ده یئنه سلطانین ذیروه سینه سول سالدیم آمما بو دؤنه داها اوره ک آغریسیندان خبر یوخ ایدی و حیات منیم اونومده بوتون گؤزه للیگی ایله اوزومه گولوردو.
بئله کی، چوخ چکیش – برکیشدن سونرا، نهلیت بیر گئجه 5/2/66 دا بو پوئمانین یارانماسیندا؛ بؤیوک بیر عشق و محبتله میدانا قدم قویدوم و ساوالانا اولان درین محبتیمی و ذؤقیمی بو پوئمانین سونونا ده ک قورودوم، آمما قلمیمین ضعیف لیگی و طبعیمین آخارلی اولماماقی مانع اولدو، اوجور کی سلطان ساوالانی گؤرموشدوم و داشلاریلا، داغلاریلا، قاریش قاریش تورپاغیلا، آخار سولاریلا و هابئله طراوتلی گول – چیچکلریله و قوشلاریلا تانیش اولموشدوم و یابی – یازی – کوزو – قیشی، جور به جور گؤرکملی منظره لرینه شاهید اولموشدوم، کاغاذ اوستونه گتیریم، دئمک بو کیچیک اثر بیر ماحال سونبولدن بیر اوووج باشاق دیر. اولسون کی، وطن قلمداشلاریمدا سلطانی گورمگه و اونون شانینده داها گؤزه ل و قدرتلی اثرلر یاراتماغا، ماراق و شؤق یارانسین.

ادبیاتین کیجیک خادمی – موغان
12/2/67