توضیحات

گوزگو و حیدربالا منظومه سی

• شاعیر: خلیل عبداللهی (گونش اوغلو)
• اؤن سؤز: دکتر حسین محمدزاده صدیق
• بیرینجی چاپ 1396
• 112 صفحه
• ناشر: انتشارات تکدرخت
• شابک: 3-33-8515-600-978

شهریارین حیدربابایه سلام منظومه سینین شعر نوعی، تورکجه شعر تاریخینده اؤزل و خاص بیر ادبی ژانر (=نوع) ساییلیر. بو شعر ژانریندا ایکی یؤز ایل بوندان قاباقدان یازیلان، خاطره لر، آنیلار و طبیعت وصفلری بیزه معلومدور. بو ژانردا یازیلان شعرلر عمومیتله، شاعرین هم طبیعت ایله باغلی دوشونجه لر (=ناتورالیسم) ینی و همده کئچمیش خاطره لر و آنایوردونا اوز توتوب سؤیله دیگیی اوره ک سیخینتی لارینی، حسرت لی دیل ایله بیان ائدیلن سؤزلرینی (=نوستالژی) احتوا ائدیردی.

بو ژانردا نوستالژی موضوعوندا شعر یازانلار، کئچمیش حادثه لره باخیب، گؤز یاشی آخیداراق، اؤزلرینی تسکین وئرمگیه و هامینی اؤز غملرینده اورتاق ائتمگه چالیشیردیلار.

شهریاردان قاباق بو شعر ژانریندا یازیلان منظومه لر، اوزه چیخاریلدیقدان سونرا، شهریارین حیدربابایا سلام منظومه سی نین بو ژانرین بیر مکتب، اسلوب و شیوه یه دؤنمه سینده اولان اهمیتلی نقشینی گؤستره جکدیر. شهریارین منظومه سی نین 1332 -نجو ایلده یاییلماسی تاریخیندن آلتمیش ایلدن چوخ کئچیر. او تاریخدن ایندیه کیمی 500 عنواندان چوخ، همین شعر ژانریندا منظومه لر یازیلمیش و یاییلمیشدیر. ایلک منظومه لر شهریارا جواب و اوندان استقبال کیمی دگرلنیردی. جبار باغچه بان، صحاف جنتی مقام، حبیب ساهر و بو کیمی قاباقجیل آدلیم شاعرلریمیز ایلک جواب یازانلاردان اولموشلار.

الینیزده اولان کتاب، گونش اوغلو طرفیندن یازیلان نئچه قطعه شعردن علاوه، شهریارا جواب اولاراق جمعی خاطره لر اساسیندا یازیلان حیدربالا منظومه سینی ده احتوا ائتمکده دیر. شاعر بو منظومه نی حیدر آدلی بالاسینا خطاب ائدیر. منظومه نین کوچه لری اوشاقلیق و گنجلیک آنیلاری و خاطره لری ایله دولودور. شاعر اوشاقلیق ایللرینده، کندی نین اطرافیندا گزدیگی یئرلرین آدلارینی دؤنه – دؤنه منظومه یه داخل ائتمیشدیر. مثال اوچون آشاغیداکی آدلاری بیر قالاق حسرت ایله یاد ائدیر.

قره گؤل، چای باشی،قمیشلی،نئهره گؤل، سویوق چشمه، سمرقیه، چالالار، پیرداغی و…

شاعر، یاشادیغی کند حیاتیندان جانلی تصویرلر وئریر. کند اهلی نین آخشام اوستو مسجد قاباغیندا بیر یئره ییغیلمالاریندان، نوروز گوللرینی دسته لمکدن و باشقا اوشاقلیق دؤورانیندان قالان خاطره لرینی یادا سالاراق، حسرت ایله، دؤنوب کئچمیشه باخیر.

گونش اوغلونون نوستالژیک شعرینی، غربت غمی چولقامیشدیر. او، بورادا بیر طرفدن کئچمیشده کی آری و زلال یاشاییشدان اوزاقلاشماغی اوچون غصه ائدیر و باشقا طرفدن یئنی حیات دوروموندا اؤزونو یالقیز و تنها حس ائدیر و شکایته دیل آچیر. اصلینده هر نوستالژیک شعرده اولدوغو کیمی، گونش اوغلونون دا بو منظومه سینده، کئچمیشلری حسرت ایله یادا سالما، همین منظومه نین یارانماسینا سبب اولموشدور.